«Չեմ կարող անարձագանք թողնել տիկին Զոհրաբյանի մոլեգին գնահատականը». Լիզա Ճաղարյան

Լրագրող Լիզա Ճաղարյանը ֆեյսբուքյան իր էջում գրել է. «Ես Արցախի նախկին վարչապետ Արայիկ Հարությունյանին չեմ ճանաչում, պատրանքներ չունեմ, որ ինքն ավելի լավն է կամ ավելի վատը մնացած թեկնածուներից, ոչ մի տեղեկություն չունեմ՝ Հայաստանի իշխանություններն աջակցում են նրան Արցախում առաջիկա նախագահական ընտրություններում, թե չեն աջակցում, գաղափար չունեմ՝ պարոն Արայիկ Հարությունյանն անկեղծորեն է գովում Նիկոլ Փաշինյանին, թե հաճոյանում է, բայց չեմ կարող անարձագանք թողնել ԲՀԿ-ական տիկին Նաիրա Զոհրաբյանի մոլեգին գնահատականը։ Երբ որ Արցախից ոմանք ընդգծված ամբարտավան են պահում իրենց Հայաստանի վարչապետի նկատմամբ, փաստորեն տիկին Զոհրաբյանը շատ նորմալ է համարում, իսկ որ գովում են՝ քծնա՞նք։ Ու մեկ էլ էդ տգեղագույն գնահատականներով, որ «օծում եք» Արցախի առաջին դեմքերից մեկին, դա, փաստորեն, սեպ խրել չի ժողովրդի երկու հատվածների միջև։ Սեպ խրելը միմիայն Արցախից Հայաստանի իշխանությունների դեմ հոխորտացողների դեմ խոսելն է։ Ցուցակը տվեք՝ նախապես իմանանք՝ արցախցիներից ում կարելի է քննադատել, որ սեպ խրել չգնահատվի, և ու՛մ դեպքում է թույլատրելի, օրինակ, «գլուխ ցխելը»»։