Երևանի խաղաքարտը Իրանն է. Թեհրանը պատրա՞ստ է աջակցել մեզ. «Ժամանակ»
 252 Հինգշաբթի, 04 հուլիսի, 2019 թ., 09:35 «Հայաստանի փոխվարչապետ Մհեր Գրիգորյանն Իրան կատարած այցի ընթացքում հանդիպել է Իրանի նախագահ Հասան Ռոհանիի հետ և քննարկել թե՛ երկկողմ, թե՛ ռեգիոնալ, միջազգային ընդգրկման հարցեր: Մհեր Գրիգորյանն Իրան է այցելել հայ-իրանական տնտեսական հանձնաժողովի 16-րդ նիստի համար: Հայաստանի փոխվարչապետի իրանյան այցին զուգահեռ տեղի էին ունենում Հայաստանի վարչապետի հեռախոսազրույցները ԵՏՄ երկրների նախագահների հետ, առայժմ բացառությամբ Պուտինի: Դրանց ընթացքում Նիկոլ Փաշինյանը խոսել է հոկտեմբերի 1-ին Երևանում սպասվող ԵՏՄ Վեհաժողովի մասին: Հայաստանը նախագահող երկիր է, և Վեհաժողովի օրակարգի ձեւավորումը, իհարկե, առաջին հերթին նախագահող երկրի պատասխանատվությունն է: Երևանի դիրքորոշումն այն է, որ պետք է միասնական գնագոյացման շուկա և մեխանիզմ, որը թույլ կտա հավասարեցնել ԵՏՄ երկրների հնարավորություններն ու պայմանները, այլապես միասնական տարածությունը կորցնում է իմաստը: Մյուս կողմից աներկբա է, որ դա ՌԴ համար կնշանակի առնվազն ԵՏՄ երկրների նկատմամբ կորցնել գազային գործիքը, մահակը, այդ թվում, իհարկե, Հայաստանի նկատմամբ: Ավելին, թեման հատկապես զգայուն է Հայաստանի առումով, և հատկապես թավշյա հեղափոխությունից հետո: Այդ ուղղությամբ Երևանն ու Մոսկվան բանակցության մեջ են արդեն մի քանի ամիս: Բանակցությունը գազի գնի շուրջ է, սակայն չկա որոշակիություն, թե ո՞ւր կգնա այդ գինը բանակցության արդյունքում՝ վե՞ր, թե՞ վար, և որն է լինելու որեւէ ուղղությամբ գնալու, այսպես ասած, գինը: Այս տեսանկյունից Երևանի խաղաքարտը կարող է լինել Իրանը, եթե համաձայնի ռուսականի հանդեպ մրցունակ գնով գազ մատակարարել Հայաստան, ինչը թույլ կտա վստահ խոսել ՌԴ հետ բանակցությունում՝ իմանալով, որ գնի շուրջ պայմանավորվածության չգալու դեպքում Հայաստանը չի մնա առանց գազ, և Իրանը կապահովի շահեկան մատակարարում: Երևանն ու Թեհրանն այս թեման շոշափեցին դեռևս փետրվարին, երբ Նիկոլ Փաշինյանն այցելել էր Իրան: Այդ իմաստով եղան քաղաքական հնչեղ հայտարարություններ, սակայն ինչ գործնական շարունակություն կա այդ մասով, հայտնի չէ: Այդ առումով էլ հետաքրքիր է, թե Մհեր Գրիգորյանի այցի ընթացքում արդյոք շոշափվե՞լ է այդ թեման, եթե ոչ հանձնաժողովի նիստում անմիջապես, ապա գոնե Իրանի նախագահի հետ հանդիպման ընթացքում: Թեհրանը պատրա՞ստ է նպաստել Երևանի դիրքերին՝ գազի գնի շուրջ Մոսկվայի հետ բանակցությանը»,-գրում է թերթը: Առավել մանրամասն՝ թերթի այսօրվա համարում: |
