«Ժողովրդին տված խոստումները պայթեցին-գնացին. իրողություն, որի հետ պետք է բոլորս հաշվի նստենք». վարչապետի ընդդիմախոսներ

Հուլիսի 31-ին լրագրողնեի հետ հանդիպեցին ԱԺ նախկին պատգամավոր Ստեփան Մարգարյանը, Ռեֆորմիստների կուսակցության նախագահ Վահան Բաբայանը և ՀՅԴ ներկայացուցիչ Գևորգ Ղուկասյանը: Նրանք գնահատականներ հնչեցրին դատաիրավական համակարգի, ՀՀ երկրորդ նախագահ Ռոբերտ Քոչարյանի հարցազրույցի և ներքաղաքական կյանքի այլ հարցերի վերաբերյալ:

Ստեփան Մարգարյանը նշեց, որ Ազգային ժողովը փոխվեց մի ԱԺ-ով, որը երկրում ոչ մի դերակատարում չունի: Այն դարձել է ամբողջովին կառավարելի: Դրանից հետո հերթը հասել է դատարաններին: Այստեղ էլ առկա է նույն նպատակը՝ դատարանները կառավարելի դարձնել:

«Եթե հաջողվի դատարանների հարցը լուծել այնպես, ինչպես ցանկանում է իշխանությունը, հաջորդ քայլը հասնելու է մամուլին»,- հայտարարեց ԱԺ նախկին պատգամավոր Ստեփան Մարգարյանը: Նա պնդեց, որ մամուլի պարագայում իշխանությունը գործելու է ոչ թե ճնշելու, այլ ուրիշ մեթոդներով: Երրորդ քայլը սեփականության տոտալ վերաբաշխումն է լինելու:

«ՀՀ-ում արդյունավետ իշխանություն չի կարող լինել հատկապես այն պատճառով, որ գործադիր, օրենսդիր և դատական իշխանությունները միմյանցից անկախ չեն: Երբևէ դատական համակարգի նկատմամբ այսպիսի ճնշումներ չեն եղել»,- այս հայտարարության հեղինակն էլ Գևորգ Ղուկասյանն է՝ ՀՅԴ-ից:

«Ռեֆորմիստների» նախագահ Վահան Բաբայանի գնահատմամբ՝ իշխանությունները հայեցակարգ չունեն: Իշխանությունները հայտարարում են տնտեսական թռիչքաձև աճ գրանցելու, Լեռնային Ղարաբաղը բանակցային կողմ դարձնելու, թոշակներն ու աշխատավարձերը բարձրացնելու, քաղաքական ազատություններ շնորհելու մասին, սակայն անում են հակառակը: «Խոստումները, որ տրվեցին ժողովրդին, պայթեցին-գնացին. իրողություն, որի հետ պետք է բոլորս հաշվի նստենք»,- հայտնեց նա:

Մատնանշելով վարչապետ Ն. Փաշինյանի՝ ուղղաթիռով շրջելու մասին սոցցանցային գրառմանը՝ բանախոսը հարցրեց. «Բա էն մարդն ի՞նչ եղավ, որ հեծանիվով գործի էր գնում: Հիմա դա կինո՞ էր, շոո՞ւ էր, ի՞նչ էր»,- ասաց նա:

Ս. Մարգարյանը կանխատեսեց, որ ստեղծվելու է այլընտրանքային ընդդիմություն, և Ռ. Քոչարյանը դրանում մեծ դերակատարություն է ունենալու: Ըստ նրա՝ Քոչարյանի հարցազրույցում կային ծրագրային տարրեր: