«Հայաստանի և Ադրբեջանի ԱԳ նախարարների հանդիպումը նախատեսվում է ոչ այնքան հեռավոր ժամանակում». Զ. Մնացականյան

Այսօր ՀՀ արտաքին գործերի նախարար Զոհրաբ Մնացականյանը լրագրողների հետ զրույցում հայտարարեց, որ Հայաստանի և Ադրբեջանի ԱԳ նախարարների հանդիպումը նախատեսվում է «ոչ այնքան հեռավոր ժամանակում»:

Անդրադարձ անելով վերջերս Նիկոլ Փաշինյանի հայտարարությանը, թե կան հարցեր, որտեղ Արցախի իշխանությունների հետ տարաձայնություններ կան, որոնց լուծման լավագույն միջոցը առաջիկա ընտրություններն են՝ Մնացականյանն ասաց. «Մեր ոլորտում մենք շատ ընդարձակ համագործակցում ու համադրում ենք մեր մոտեցումները Արցախի իշխանությունների հետ՝ առաջ տանելու մեր օրակարգը, որը վերաբերում է խաղաղ կարգավորման գործընթացին: Մենք ունենք նպատակներ, դրան հասնելու ճանապարհներ, տարբեր հարցերի շուրջ տարբեր գաղափարներ, ինչը բնականոն է: Քննարկումների, վեճերի, համադրումների մեջ մենք հստակ պահում ենք գիծը համակարգված առաջ տանելու մեր մոտեցումները, սկզբունքային դիրքորոշումները, որոնք առնչվում են խաղաղ գործընթացին: Մեր անհամաձայնությունները խորքային չեն, թե ինչպիսին են մեր ստրատեգիական մոտեցումները Արցախի հարցում»,- ասաց նախարարը: