«Մեր ԱԳՆ-ն պետք է հստակ և ավելի կտրուկ արձագանքի Մամեդյարովի ելույթին». Արմեն Աշոտյան

ՀՀԿ փոխնախագահ Արմեն Աշոտյանը ֆեյսբուքյան իր էջում գրել է. «Նյու Յորքում ընթացող ՄԱԿ-ի Գլխավոր աասամբլեայում երեկ ելույթ է ունեցել նաև Ադրբեջանի ԱԳ նախարարը։

Մամեդյարովը կանխատեսելի էր։ «Широко шагает Азербайджан» գազանավթային դոպինգի մասին սոցիալ-տնտեսական ճոռոմաբանություն, Ադրբեջանի կողմից միջազգային հարթակներում նոր նախաձեռնությունների մասին պատումներ և, իհարկե, Լեռնային Ղարաբաղ ու Հայաստան։

Մեզ վերաբերող հատվածը օրիգինալ չէր. «օկուպացիա, էթնիկ զտումներ, տարածքային ամբողջականություն» տրիադան համեմված էր ՄԱԿ-ի Անվտանգության Խորհրդի համապատասխան բանաձևերի շահարկմամբ և մեզ ուղղված սպառնալիքներով։ Հատկանշական էր նաև Մինսկի խմբի համանախագահների ձևաչափով բանակցությունների փաստացի անարդյունավետության մասին ակնարկը։

Նիկոլ Փաշինյանի առաջարկված բանաձևը 3 կողմերի համար ընդունելի լուծման մասին, բնական է, մերժվեց և շեշտադրվեց «կա՛մ ամբողջը, կա՛մ պատերազմ» մոտեցումը։

Հետևավաբար՝ դիվանագիտական և բանակցային գործընթացներին զուգահեռ այս իշխանությունների սրբազան պարտքն է երկրի ներսի խրամատների փոխարեն ամրացնել Արցախի և Հայաստանի անվտանգությունը իրական խրամատներում։

Կարծում եմ, մեր ԱԳՆ-ն պետք է հստակ և ավելի կտրուկ արձագանքի Մամեդյարովի այս ելույթին։ Մեր խորհրդարանականները նույնպես պետք գործով զբաղվեն. դրսում ավելի քիչ խոսեն «հեղափոխությունից» և առավել լծվեն միջազգային քաղաքական շրջանակներում Արցախի թեմատիկային»: