Թուրքիայում տասնյակ քաղաքացիներ են բերման ենթարկվել Սիրիա ներխուժումը քննադատելու համար

Աշխարհի տարբեր կողմերից դատապարտող հայտարարություններ և դադարեցման կոչեր են տարածվել Թուրքիայի կողմից Սիրիայի հյուսիս-արևելքում իրականացվող «Խաղաղության ակունք» ռազմագործողության թեմայով:

Միջազգային քննադատական արձագանքներին զուգահեռ Թուրքիայի բազմաթիվ քաղաքացիներ ևս սոցցանցերում այդ ռազմագործողության հասցեին քննադատական գրառումներ են կատարել:

Սոցցանցերում ռազմագործողությունը քննադատող հրապարակումների համար Ադանայում 46 օգտատեր է բերման ենթարկվել, գրում է Ermenihaber.am-ը:

Ադանայի նահանգային ոստիկանական բաժանմունքի անվտանգության վարչության ստորաբաժանումները քաղաքացիներին բերման են ենթարկել «սև քարոզչություն իրականացնելու, ժողովրդի մեջ ատելություն տարածելու» հոդվածի հատկանիշներով: