«Քոչարյանի որդու գործը շատ ավելի բարդ է». Վարդան Հարությունյան

Հասարակական գործիչ, իրավապաշտպան, հրապարակախոս Վարդան Հարությունյանը ֆեյսբուքյան իր էջում գրել է. «Երկար ժամանակ է՝ ուզում էի սա գրել․
Երբ Ուկրաինայում Վիկտոր Յանուկովիչն իր քաղաքական հակառակորդներից մեկին՝ Յուլյա Տիմոշենկոյին բանտարկեց՝ մոր պաշտպանության գործն իր ձեռքը վերցրեց նրա դուստրը։ Շատերն էին նրանով հիանում։ Ինքնամոռաց պաշտպանում էր մորը։ Այդ շրջանում նրա անունը մամուլի էջերից չէր իջնում։ Հենց մայրն ազատ արձակվեց՝ նա հեռացավ հրապարակային գործունեությունից ու մոռացվեց։ Այն աստիճան, որ այս գրառումը անելիս փորձեցի հիշել անունը, բայց չկարողացա։
Հիմա Քոչարյանի որդին էլ իր հորն է պաշտպանում։ Քոչարյանի մնացած պաշտպաններից այս մի պաշտպանի մոտիվացիան ավելի քան հասկանալի է, ավելի քան բնական է։ Չի էլ բացառվում, որ նա միակ (կամ քչաթիվ) անշահախնդիրն է։
Կա, իհարկե, տարբերություն Տիմոշենկոյի և Քոչարյանի միջև։ Տիմոշենկոյի գործողությունների արդյունքում արյուն չէր հեղվել, նա բանակով ու ոստիկաններով իշխանություն չէր պահել, նա իր քաղաքական հակառակորդներին չէր հալածել։ Այս իմաստով Տիմոշենկոյի դստեր գործը հեշտ էր։ Քոչարյանի որդու գործը շատ ավելի բարդ է, բայց, ինչ էլ որ լինի, ինչպես էլ մեզանից յուրաքանչյուրը վերաբերվի Քոչարյանին կամ նրա պաշտպանությամբ հանդես եկողներին, պետք է ընդունենք՝ Քոչարյանի որդին հորն է պաշտպանում։ Արդյունավե՞տ է նրա/նրանց կազմակերպած պաշտպանությունը։ Չեմ կարծում։ Բայց նա անում է այն, ինչ պետք է անի՝ հորն է պաշտպանում»: