Իրանը սպառնում է հարվածել ԱՄՆ դաշնակիցներին՝ հարձակման դեպքում

Թեհրանը պատրաստ կլինի հարված հասցնել ցանկացած պետության, որը որոշում կկայացնի օգնել ԱՄՆ-ին՝ Իրանի վրա հարձակում գործելու համար: Այս մասին հաղորդում է Press TV-ն՝ հղում անելով Իսլամական հեղափոխության պահապանների կորպուսի հայտարարությանը:

«ԱՄՆ դաշնակից ցանկացած երկիր, եթե հանդես կգա թշնամական ու ագրեսիվ գործողության մասնակցի դերում՝ ընդդեմ Իրանի Իսլամական Հանրապետության, հարվածի տակ կընկնի»,- նշված է հայտարարությունում։
Մասնավորապես, CNN-ը հղում անելով իրանական ռազմաքաղաքական կազմավորման հայտարարությանը, գրում է, որ Իրանի ռմբակոծության դեպքում հարձակումներ կիրականացվեն Իսրայելի և Արաբական Միացյալ Էմիրությունների վրա:

Բացի այդ, Իսլամական հեղափոխության պահապանների կորպուսը սպառնացել է հարվածներ հասցնել ԱՄՆ-ի տարածքին, եթե Վաշինգթոնը որոշի պատասխանել Իրաքում ռազմաբազաների վրա հրթիռային հարվածներին: