«Վանեցյանը չի ասել, Փաշինյանն է ասել, որ գործը ջուր է». Հ. Խուդոյանը՝ Ս. Սաֆարյանին

Արդեն հայտնել ենք, որ ՀՀ երկրորդ նախագահ Ռոբերտ Քոչարյանի և մյուսների գործով մարտի 3-ի նիստում դատավոր Աննա Դանիբեկյանին ինքնաբացարկի միջնորդություն ներկայացրեց պաշտպան Հայկ Ալումյանը: Ըստ նրա՝ այս տարվա հունվարի 9-ին ներկայացված միջնորդությունից հետո ի հայտ է եկել այնպիսի հանգամանք, որը բացառում է դատավորի մասնակցությունը տվյալ քրգործին: Ըստ այդմ՝ ԲԴԽ նախագահ Ռուբեն Վարդազարյանն անցյալ տարվա դեկտեմբերի 12-ին լրատվամիջոցներից մեկին տված հարցազույցում ասել է, թե իշխանությունները ցանկանում են, որ մեր բոլոր դատավորները լինեն դատավոր Աննա Դանիբեկյանի նման:
Հ. Ալումյանը որպես հիմնավորում մի համեմատական արեց: Ըստ նրա՝ ժամանակին Վերաքննիչ դատարանի դատավոր Մխիթար Պապոյանն ինքնաբացարկ հայտնեց միայն նրա համար, որ համացանցում հրապարակվել էր մի նյութ, որն ըստ նրա՝ արատավորում է իրեն: Այդ փաստով ինքը դիմել էր դատարան, քրեական գործ էր հարուցվել: Աննա Դանիբեկյանի պարագայում Նարեկ Մութաֆյանն ու Սարգիս Օհանջանյանը դիմել էին դատավորին, ըստ իրենց՝ վիրավորական արտահայտություններով, նա էլ դիմել էր դատարան, քրգործ էր հարուցվել: Ըստ Հ. Ալումյանի՝ այստեղ նույն իրավիճակի ավելի արտահայտված ձևն է:
Հիշեցնենք, որ խոսքն այն մասին է, որ սոցցանցի օգտատերերից մեկը գրառում էր կատարել, թե Ռ. Քոչարյանին ազատ արձակած դատավոր Դավիթ Գրիգորյանի որոշման կազմմանը մասնակցել է դատավոր Մ. Պապոյանը։ Դրանից հետո դատավորը հանցագործության մասին հաղորդում էր ներկայացրել իրեն զրպարտելու համար:
Մեղադրող Գևորգ Բաղդասարյանը պնդեց, որ համեմատությունները տեղին չեն: Ըստ նրա՝ Մ. Պապոյանի դեպքում գործ ունենք քրեական գործի և կայացված վճռի հետ, իսկ Ա.Դանիբեկյանի դեպքում՝ դատավորի դատավարական գործունեությանը միջամտելու փաստի հետ: Մեղադրողը նշեց, որ պաշտպանները խուսափեցին պատասխանել դատավորր այն հարցին, թե ինչ կապ ունի այն գործն այս գործի հետ: Նրանք պնդեցին, որ միջնորդությունը հիմնավոր չէ և ենթակա է մերժման:
Մեղադրողների խոսքին հետևեց Ռ. Քոչարյանի պաշտպանների ծիծաղը: Աննա Դանիբեկյանն ասաց, որ դա անհարգալից վերաբերմունք է դատարանի նկատմամբ և չպետք է կրկնվի:
Պաշտպան Արամ Վարդևանյանը շարունակեց պնդել, որ համեմատությունը տեղին է, և դրա ապացույցը հենց դատավոր Ա. Դանիբեկյանի տված բացատրությունն է, որտեղ նա ասել է, որ իրեն մոտեցած երիտասարդներ Մութաֆյանն ու Օհանջանյանն իրեն հարցեր են տվել, որոնք վերաբերել են Ռ. Քոչարյանի խափանման միջոցի վերաբերյալ իր կայացրած որոշմանը:
Նիստում Հ. Ալումյանը, մանրամասն մեջբերելով ԱԱԾ և ՀՔԾ ղեկավարներ Ա. Վանեցյանի և Ս. Խաչատրյանի՝ համացանցով տարածված հեռախոսային խոսակցությունը, դրանք որպես դատարանների վրա ազդեցության արտահայտություն ներկայացրեց: Հիշեցրեց «գործը ջուր է», «ռուսներին կարող է դուր չգալ Յու. Խաչատուրովի կալանքը» արտահայտությունները: Տուժողների շահերի ներկայացուցիչ Ս. Սաֆարյանը մտահոգիչ համարեց արտաքին ուժերի մասին խոսակցության մեջբերումը:
Պաշտպան Հովհաննես Խուդոյանն ի պատասխան ասաց. «Ա. Վանեցյանին ուղղված քաղաքական բնույթի պախարակումներ հնչեցին: Տիկի՛ն Սաֆարյան, Վանեցյանը չի ասել, Ն. Փաշինյանն է ասել, որ գործը ջուր է»,- նշեց պաշտպանը:
Սրանով միջնորդությունների քննարկումն ավարտվեց, դատարանն անցավ խորհրդակցական սենյակ: Վճիռը կհրապարակվի մարտի 6-ին:

Ինչ վերաբերում է «գործը ջուր է» արտահայտությանը, հիշեցնենք. 2018-ի դեկտեմբերին, անդրադառնալով իր և Արթուր Վանեցյանի գաղտնալսված հեռախոսազրույցի նոր հրապարակմանը, Փաշինյանն այսպես էր արձագանքել. «Այդ ժամանակ ես գտնվում էի Սանկտ Պետերբուրգում, մասնակցում էի ԵԱՏՄ միջկառավարական խորհրդի նիստին, իսկ Ազգային անվտանգության ծառայության տնօրենը՝ Շվեյցարիայում: Երբ պարոն Խաչատուրովի փաստաբանների կողմից ազդակ է գնացել, որ նրան մեղադրանք են առաջադրում, տարբեր երկրներից մեզ ազդակներ են եկել... Բայց ինձ համար կարևոր է, որ մեր աշխատանքի հիմքում դրված սկզբունքը կիրառվի՝ եթե անհրաժեշտ է կալանավորել, ուրեմն պետք է կալանավորվի: Դրանից հետո ստացել եմ զանգեր կրկին ԱԱԾ տնօրենից, որ հիմա էլ դատական համակարգն է ահազանգ դրել, տարբեր բաներ են ասում, ընդհուպ՝ ասում են, որ գործը ջուր է, տակը բան չկա: Ես էլի զանգել եմ ՀՔԾ պետին, ասել եմ՝ ասում են ահազանգ կա, ասում են, որ գործը պինդ չի, ինքն ասել է՝ գիտեք՝ մենք քննչական մարմին ենք, մենք փողոցից եկած չենք, որ այդ մասշտաբի մարդկանց ուղղակի ուղարկենք կալանավորման»,- պարզաբանել էր Փաշինյանը: