«Մարդիկ ասում են՝ երբ չենք աշխատելու, մեզանից գազի, հոսանքի վարձ են ուզելու, ո՞նց են լուծվելու այդ հարցերը». Մարուքյանը՝ Փաշինյանին

«Այն մարդիկ ովքեր չեն աշխատելու այս ընթացքում, ասում են, որ արտակարգ դրության պայմաններում, հարկադիր արձակուրդում ենք և չենք աշխատելու, մեզանից գազի, հոսանքի վարձ են ուզելու, ո՞նց են լուծվելու այդ հարցերը։ Բացի այդ՝ մարդկանց պետք է հստակ բացատրել՝ դուրս գա՞ն փողոց, թե՞ չգան, ո՞ր դեպքում դուրս գան․․․Հավաքներ կազմակերպե՞ն, թե՞ չէ, օբյեկտները, ռեստորանները աշխատե՞ն, թե՞ ոչ»,- այսօր ԱԺ-ում՝ դիմելով վարչապետ Նիկոլ Փաշինյանին, ասաց ԼՀԿ պատգամավոր Էդմոն Մարուքյանը։

Պատասխանելով Մարուքյանին՝ վարչապետն ասաց․ «Մենք օպերատիվ այդ հարցերի վերաբերյալ որշումները կներկայացնենք։ Մարդը, բնական է, պետք է ապրի, էլեկտրաէներգիայի, գազի վարձ վճարի, պետք է ևս մեկ անգամ քննարկենք այդ հարցերը»։

Ինչ վերաբերում է ռեստորանների փակվելուն, վարչապետն ասաց․ «Տեսեք, մենք չենք ասում, որ ռեստորանները Հանրապետության պետք է փակվեն, որովհետև հասկանում ենք, որ նախ պետք է այդ միջոցը արդարացված լինի, երկրորդ՝ արդյունավետ լինի, և երրորդ, եթե ռեստորանները փակենք ու մատուցողներին ասենք՝ դուք էլ եկամուտ չեք ստանալու, այստեղից հարց է առաջանում, բա որտեղի՞ց ենք այդ եկամուտը ստանալու: Դրա համար մենք օպերատիվ այդ որոշումները կկայացնենք, ըստ իրավիճակի, ըստ համաճարակաբանական իրավիճակի»:

Վարչապետը հավելեց, որ հիփոթեքային վարկային սպասարկումները մինչև 6 ամսով կերակարձգվեն և քաղաքացիներն այս ընթացքում չեն կանգնի խնդրի առաջ։

Նիկոլ Փաշինյանը նշեց, որ Արտակարգ դրությունը կտևի մինչև ապրիլի 14-ը, ժամը 9։00-ն։

Հիշեցնենք, որ Ազգային ժողովում քննարկվում է կորոնավիրուսով պայմանավորված Արտակարգ դրություն հաստատելու հարցը։