«Մենք «սև ցուցակում» հայտնվելու եզրին ենք»․ Հակոբ Ճաղարյան

«Քաղավիացիայի կոմիտեի նախագահ Տաթևիկ Ռևազյանը չէր կարող տեղեկացված չլինել համակարգում առկա թերացումներից»,- «Երկիր Մեդիա» հեռուստաընկերության եթերում ասել է վարչապետի նախկին խորհրդական Հակոբ Ճաղարյանը:
Հարցին, թե ի՞նչ հարաբերություններ է ունեցել Տաթևիկ Ռևազյանի հետ, Ճաղարյանը նշել է, որ աշխատանքում իր համար անձնական հարաբերություններ չկան և ինքը բազմիցս փորձել է օգնել Տաթևիկ Ռևազյանին, սակայն այդ առաջարկը չի ընդունվել:

Ճաղարյանը եթերի ընթացքում հայտնել է, որ Միջազգային ավիացիոն կազմակերպության աղմկահարույց զեկույցից հետո Հայաստանը գտնվում է «սև ցուցակում» հայտնվելու եզրին․ «Ինչպես փորձը ցույց է տալիս, սև ցուցակում հայտնված երկրներին եվրոպական պետությունները ագելում են մուտք գործել իրենց երկիր: Իհարկե, կան հնարավորություններ խուսափելու այդ ամենից, այսինքն՝ ավիաընկերություններին որպես անհատ միավորներ հնարավորություն է տրվում անցնել այդ ստուգումները և որպես ավիաընկերություն հաստատել իրենց կարողությունները թռիչքային անվտանգության միջազգային նորմերը կատարելու տեսանկյունից: Այսինքն՝ անկախ նրանից, որ երկիրը պատրաստ չէ ապահովել այդ նորմերը, ԵՄ-ն պատրաստ է առանձին ավիաընկերություններին տալ այդ հնարավորությունը»,- ասել է վարչապետի նախկին խորհրդականը:

Անդրադառնալով իր՝ պաշտոնից ազատմանը՝ Ճաղարյանն ասել է. «Եթե ես պետք է մասնագիտական խորհուրդներ ներկայացնեմ, որոնք չլսվեն, չկատարվեն, ես իմ աշխատավարձ ստանալը գտնում եմ անտեղի: Ինչի՞ համար եմ ես այդ դեպքում զբաղեցնում այդ պաշտոնը: Ես երբեք չեմ ձգտել պետական համակարգում ունենալ պաշտոն, որևէ աշխատավարձի համար: Ես բավականին ապահովված մարդ եմ և կարող եմ ինձ թույլ տալ երկրի հանդեպ ունեցած վերաբերմունքով աշխատել ոչ իմ աշխատավարձի համար»,- ասել է նա:
Մանրամասները՝ տեսանյութում: