«Լուսավոր Հայաստան» խմբակցության նախագիծը չընդունվեց

Խորհրդարանում ավարտվեց արտակարգ դրությունը 30-օրով երկարացնելու մասին կառավարության որոշումից հետո հրավիրված հատուկ նիստը։ Նիստի ավարտին Ազգային ժողովը 14 կողմ, 77 դեմ, 15 ձեռնպահ ձայների հարաբերակցությամբ չընդունեց «Լուսավոր Հայաստան» խմբակցության կողմից ներկայացված արտակարգ դրության իրավական ռեժիմով նախատեսված որոշակի միջոցառումների իրականացումը չեղյալ հայտարարելու մասին առաջարկը։

Նախագծով, մասնավորապես, առաջարկվում էր արտակարգ դրության օրերին թույլատրել ավտոբուսների և մետրոպոլիտենի աշխատանքը, վերաբացել նաև շինանյութի, տնտեսական, սպորտային խանութները, արհեստագործական նշանակության կետերը, թույլատրել միջմարզային ուղևորափոխադրումները՝ գյուղատնտեսական և շինարարական աշխատանքներին մասնակցելու համար։

Հիշեցնենք, որ Կառավարությունն այսօր արտահերթ նիստում որոշեց արտակարգ դրությունը ապրիլի 14-ից, ժամը 17:00-ից երկարաձգել մինչև մայիսի 14-ը, ժամը 17:00-ն: