«Ներքին քաղաքական պայքարից ալեկոծվում է Թուրքիայի ներքաղաքական կյանքը». թուրքագետ

Թուրքագետ, քրդագետ Կարեն Հովհաննիսյանը ֆեյսբուքյան իր էջում գրել է. «Թուրքիայի ներքին քաղաքական կյանքը կրկին ալեկոծվում է, բայց այս անգամ, ոչ թե ընդդիմություն և իշխանություն համատեքստում, այլ բացառապես իշխանության ներսում։ Ներիշխանական տարբեր ուղղվածության քաղաքական խմբերը դուրս են եկել պայքարի Թուրքիայի խորհրդարանի նախագահի պաշտոնի համար։ Հուլիսի 12-ին Թուրքիայի Մեծ Միլլի Մեջլիսը պետք է ընտրի խորհրդարանի նախագահ։ Թուրքիայի բարձրագույն օրենսդիր մարմինը մեկ գումարման խորհրդարանի համար երկու անգամ է ընտրում նախագահ։Առաջինը՝ երկու տարի ժամկետով, երկրորդը՝ երեք տարի ժամկետով, մինչև մեկ գումարման խորհրդարանի լիազորությունների դադարումը։
Այս պահին Թուրքիայի Ազգային Մեծ ժողովի նախագահն է Մուստաֆա Շենթոփը, ով 2019 թվականի փետրվարի 24-ին է ընտրվել խորհրդարանի 29-րդ խոսնակ Բինալի Յըլդըրըմի հրաժարականից հետո, ով հրաժարական տվեց, որպեսզի մասնակցի 2019 թվականի Ստամբուլի քաղաքապետի ընտրություններում՝ որպես քաղաքապետի թեկնածու։
Ըստ իմ ունեցած տեղեկությունների՝ Թուրքիայի խորհրդարանի նախագահի ընտրություններից հետո սպասվում է նաև կառավարության կազմի փոփոխություն»։