«Հավաքների ազատությունը պետք է չսահմանափակվի արտակարգ դրության ընթացքում». Էդմոն Մարուքյան

«Մենք քաղաքական և քաղաքացիական իրավունքների համատեքստում պետք է որոշում կայացնենք, թե ինչպես ենք ոսկե միջինը ընտրում, որ քաղաքական ու քաղաքացիական իրավունքները հնարավորինս կիրարկելի լինեն և մարդիկ կարողանան իրենց իրավունքները «վայելել»»,- այսօր ԱԺ-ում հատուկ նիստին հայտարարեց ԱԺ ԼՀԿ խմբակցության ղեկավար Էդմոն Մարուքյանը:

Մարուքյանն առանձնացրեց անձանց բողոքի ձայնը հնչեցնելու հետ կապված խնդիրները արտակարգ դրության պայամաններում:

«Բողոքի իրավունքը, հավաքների ազատությունը պետք է չսահմանափակվի, և անգամ պանդեմիայի ժամանակ այս իրավունքը իրացվում է, բնականաբար, համապատասխան չափանիշներով, օրինակ՝ սոցիալական հեռավորությունը պահելով: Ես Կառավարությանն առաջարկում եմ այս իրավունքի հետ կապված գնալ ընդառաջ և քաղաքական և քաղաքացիական իրավունքների առումով քայլ կատարել, հնարավորություն տալ, որ ովքեր ցանկանում են որոշակի բողոքի ակցիաներ անել, կարողանան իրականացնել դրանք»,- ասաց Մարուքյանը:

Պատգամավորը ելույթի ընթացքում հավաստիացրեց, որ ներկայիս իշխանությունն ընդհանրապես մտահոգվելու խնդիր չունի բողոքի ակցիաների հետ կապված և ինքն անձամբ համաձայն չէ այն հիմնավորումներին, թե արտակարգ դրությունը մտցվում է, որ բողոքի ակցիաներ չլինեն. «Մտահոգությունն առողջությունն է: Եկեք պայամաններ ձևավորենք, թե ինչ ձևով մարդիկ կարող են իրենց բողոքը հնչեցնել»,- հավելեց Մարուքյանը: