«Կունենանք վարակվածների աճ․ ընդդիմադիրները նորից մեղադրելու են Առողջապահության նախարարությանը». Արփի Դավոյան

«Մեր իշխանության օրոք որևէ քաղաքական հետապնդում չի եղել և չի էլ կարող լինել»,- այսօր՝ լրագրողների հետ զրույցի ժամանակ ասաց ԱԺ «Իմ քայլը» խմբակցության պատգամավոր Արփի Դավոյանը՝ հավելելով, որ նման հայտարարություններ անում են այն շրջանակները, որոնց դա ձեռնտու է:

Անդրադառնալով երեկ մի շարք պատգամավորների նկատմամբ ԱԱԾ շենքի տարածքում իրավապահ մարմինների կողմից իրականացվող քայլերին, Դավոյանը նշեց, որ իրավապահների գործողությունները բռնություն չի որակում. «Ոստիկանների գործողությունները համարում եմ իրավաչափ: Ոստիկանները որևէ բռնություն չեն կիրառել, ուղղակի տեղի է ունեցել հավաք, որը արտակարգ դրության պայմաններում իրավաչափ չէ: Ես անչափ անհանգստացած եմ, որ մենք մի տասը օր հետո ունենալու ենք վարակվածների մեծ թվի աճ և որի պատճառը դառնալու են երեկվա այդ ամբողջ գործողությունները: Հետո նորից մեր ընդդիմադիր գործընկներները մեղադրելու են Առողջապահության նախարարությանը և ասելու են՝ այսպես չէ, այնպես չէ»,- ասաց պատգամավորը: