Շավարշ Քոչարյանը՝ սահմանային իրավիճակի ու ՀԱՊԿ-ի հայտարարության մասին

Այսօր՝ հուլիսի 17-ին, Մինսկում լրագրողների հետ զրույցի ժամանակ Հայաստանի ԱԳ փոխնախարար Շավարշ Քոչարյանն անդրադարձավ հակառակորդի ագրեսիվ գործողություններին: «Ռազմական լայնամասշտաբ գործողությունները կանխելու երկու գործոն կա։ Մեկն այն է, որ իրականացնում է մեր պաշտպանության նախարարությունը, մեր բանակը, որը ցույց է տալիս, որ այդպիսի մոտեցումները միշտ պատժվելու են, կանխվելու են: Երկրորդ՝ դիվանագիտական ասպարեզում պետք է լինել շատ ակտիվ, որովհետև ակնհայտ է, որ տեղի է ունեցել ագրեսիայի ակտ՝ անկախ Հայաստանի հանդեպ։ Ինչ վերաբերում է միջազգային արձագանքին, ապա շատ կարևոր է արձանագրել՝ ո՞վ էր, որ հրաժարվում էր, որպեսզի լինեն դիտորդներ, սարքեր, որոնք նմանատիպ իրավիճակներում կկարողանան անկողմնակալորեն հայտնաբերել՝ ով է սկսել հարձակումը: Դեմ էր Ադրբեջանը և այսօր փորձում է ներկայացնել, թե իբր հայկական ուժերն են սկսել հարձակումը: Հենց այն հանգամանքը, որ դրան միշտ դեմ են եղել, խոսում է այն մասին, որ իրենք միշտ կողմ են եղել նմանատիպ քայլերին»,- նշեց ԱԳ փոխնախարարը։ Շավարշ Քոչարյանը զրույցի ընթացքում համոզմունք հայտնեց, որ նա, ով նախաձեռնում է որոշակի արկածախնդրություն, նախապես պատրաստվում և ներկայացնում է, թե իբր ինքն է ենթարկվել հարձակման:
Հարցին, թե պաշտոնական Երևանը հիասթափված չէ՞ ՀԱՊԿ-ի հայտարարությունից, որը հավասարության նշան դրեց Հայաստանի և Ադրբեջանի միջև՝ կոչ անելով կանգնեցնել հակամարտությունը, Շավարշ Քոչարյանը պատասխանեց, որ Հայաստանը ՀԱՊԿ-ին օգնության նպատակով չի դիմել։

«Մեր նպատակը լրիվ այլ էր՝ տեղեկացնել մեր գործընկերներին, թե ինչ իրավիճակ է, որովհետև եթե Հայաստանի սահմանների հանդեպ եղել է սադրանք, նրանք պիտի տեղեկանան։ Դրա համար ինձ համար զարմանալի է, որ մարդիկ ինչ-որ սպասելիքներ ունեն»,- հայտարարեց Շավարշ Քոչարյանը։