Աննա Նաղդալյանը՝ ՀԱՊԿ հայտարարության մասին

Հուլիսի 14-ին Հավաքական անվտանգության պայմանագրի կազմակերպությունը (ՀԱՊԿ) հանդես էր եկել պաշտոնական հայտարարությամբ՝ հայ-ադրբեջանական սահմանին տիրող իրավիճակի վերաբերյալ: Մեկնաբանելով այդ հայտարարությունը՝ ճեպարզույցի ժամանակ ԱԳՆ խոսնակ Աննա Նաղդալյանն ասաց. «Ստեղծված իրավիճակում Հայաստանը կարևորում էր նաևառաջ ՀԱՊԿ-ի իր գործընկերներին․ սահմանին ստեղծված իրադրության մասին տեղեկատվության տրամադրումը մեր առաջնային նպատակն էր: Ինչ վերաբերում է ՀԱՊԿ գլխավոր քարտուղարության հայտարարությանը, ասեմ, որ այն լիովին արտահայտում է այս փուլում մեր մտահոգությունները: Այդ հայտարարության մեջ միանշանակորեն նշված է, որ այս լարվածությունը տեղի է ունենում ՀԱՊԿ պատասխանատվության տարածաշրջանում: Մենք լիովին հսկում ենք իրադրությունը սահմանային գծում և այժմ ՀԱՊԿ-ին որևէ այլ ձևաչափով դիմելու կարիք չկա»:

Հիշեցնենք՝ նախօրեին ՀԱՊԿ հայտարարությանն էր անդրադարձել նաև ԱԳ փոխնախարարը։ Հարցին, թե պաշտոնական Երևանը հիասթափված չէ՞ այդ հայտարարությունից, որը հավասարության նշան դրեց Հայաստանի և Ադրբեջանի միջև՝ կոչ անելով կանգնեցնել հակամարտությունը, Շավարշ Քոչարյանը պատասխանել էր, որ Հայաստանը ՀԱՊԿ-ին օգնության նպատակով չի դիմել․ «Մեր նպատակը լրիվ այլ էր՝ տեղեկացնել մեր գործընկերներին, թե ինչ իրավիճակ է, որովհետև եթե Հայաստանի սահմանների հանդեպ եղել է սադրանք, նրանք պիտի տեղեկանան։ Դրա համար ինձ համար զարմանալի է, որ մարդիկ ինչ-որ սպասելիքներ ունեն»։