Ի՞նչ ճակատագիր է ունեցել ամոնիումի նիտրատ տեղափոխող #Rhosus նավը. #NYT

Rhosus նավը, որն իրականացրել է ամոնիումի նիտրատի խմբաքանակի տեղափոխումը, և որի պատճառով օգոստոսի 4-ի երեկոյան Բեյրութի նավահանգստում տեղի ունեցավ ուժգին պայթյունը, խորտակվել է 2018 թվականին, գրում է The New York Times-ը՝ ուսումնասիրելով նավի տեղաշարժին վերաբերող տվյալները և արբանյակային լուսանկարները: Նավը դուրս է եկել վրացական Բաթումի նավահանգստից 2013 թվականի սեպտեմբերին՝ ուղևորվելով Մոզամբիկ: Սակայն, այն մուտք է գործել Բեյրութի նավահանգիստ, որտեղ տեղական իշխանությունները նավի վրա հայտնաբերել են անհամապատասխանություններ և առգրավվել են նավի վրա առկա բեռը: Rhosus նավից արձակվող վերջին ազդանշանը գրանցվել է 2014-ի օգոստոսի 7-ին, գրում է NYT-ը: Նավի անձնակազմին հաջողվել է լքել այն, որից հետո տեղական իշխանությունները ամոնիումի նիտրատը տեղափոխել են պահեստներ: 2015-ին նավը տեղափոխվել է նավահանգստի մեկ այլ վայր, որտեղ կանգնած է մնացել 3 տարի: Արբանյակային լուսանկարներից երևում է, որ Rhosus-ի չափսերին համապատասխանող նավը, դատարկ կանգնած է եղել նավահանգստում: 2018-ի փետրվարին նավը վնասվածքի պատճառով սկսել է խորտակվել, իսկ մի քանի օր անց, այն ամբողջությամբ հայտնվել է ջրի տակ: Փետրվար 18-ին արված արբանյակային լուսանկարները վերլուծել է Maxar-ի փորձագետ Սթիվեն Վուդը: Ըստ նրա՝ խորտակված նավը պարզ երևում է արբանյակային լուսանկարներում: Օգոստոսի 5-ի դրությամբ Rhosus-ը գտնվում է պայթյունի վայրից ավելի քան 500 մետր հեռավորության վրա՝ ամբողջությամբ ջրի տակ: