«Շրջաններ վերադարձնելու մասին խոսելը դառնում է աբսուրդ»․ Անդրանիկ Քոչարյան

«Տևական մարտերից հետո բանակցային ամբողջ տրամաբանությունը կարող է փոխվել, մինչդեռ նախկինում խոսվում էր խաղաղ բանակցությունների միջոցով խնդիրը լուծելու մասին։ Ադրբեջանը և Թուրքիան որոշեցին բիրտ ուժի միջոցով արագ լուծել խնդիրը, սակայն դա չհաջողվեց իրենց։ Հիմա այս վիճակից դուրս գալու փնտրտուքն արդեն աշխարհի խնդիրն է, որովհետև անվտանգության գոտին միջազգային կարևորություն է ձեռք բերել, և այդ գոտու շրջանակներում սկսում են տեղակայվել ահաբեկչական ուժեր, որոնք օգտագործվում են Թուրքիայի կողմից, և դրանք արդեն մարտահրավեր են թե՛ Ռուսաստանի, թե՛ Իրանի համար»,- այսօրվա ճեպազրույցում հայտարարեց «Իմ քայլը» խմբակցության պատգամավոր Անդրանիկ Քոչարյանը։
«Այսօր անվտանգության գոտին բոլորովին այլ արժեք ունի և այն պիտի դառնա այնպիսին, որ պահպանի Արցախի անտանգությունը, այսինքն՝ շրջանների վերադարձնելու մասին խոսելը դառնում է աբսուրդ։ Բնականաբար, փոխզիջումներ պիտի լինեն, բայց դրա դեպքում չի կարող հաշվի չառնվել մեր անտանգության գոտու կարևորությունը՝ ոչ միայն Արցախի, այլև հարակից պետությունների համար»,- ընդգծեց Քոչարյանը։