«Թուրքիան այս պատերազմի պլանավորումն ու կառավարումն իրականացնողն է». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Կսկսե՞ր Ադրբեջանը պատերազմ, առանց Թուրքիայի: Այս հարցը հաճախ շոշափվողներից է: Գրեթե համոզված եմ, որ չէր սկսի: Ընդ որում՝ տվյալ պարագայում Թուրքիան կարող ենք դիտարկել թե՛ ուղիղ, թե՛ պայմանական. չէր սկսի առանց պայմանական Թուրքիայի: Բայց քանի որ կա իրականը, պայմանականի մասին խոսելու կարիք էլ չկա: Չէր սկսի, որովհետև Ադրբեջանն ունի նավթ, գազ, միլիարդներ, մեծ թվով սպառազինություն, բայց չունի ռեգիոնալ պատերազմ սկսելու և վարելու քաղաքական կշիռ և պրոֆեսիոնալ կարողություն: Մի բան պետք է արձանագրենք՝ Թուրքիան այս պատերազմի աջակիցը չէ, Թուրքիան այս պատերազմի պլանավորումն ու կառավարումն իրականացնողն է, և որոշակի մեխանիզմներով նաև մասնակից՝ անմիջական հրամանատարություն օդից, մասնակցություն ցամաքային դիվերսիոն օպերացիաների, հրամանադրում, ահաբեկիչների ներբեռնում: Հիմա, համադրում ենք դրանով հանդերձ մեր բանակի դիմակայությունն ու հասցվող պատասխան հարվածները, և դրա համատեքստում հանում ենք այդ թուրքական մասնակցությունը՝ տակը չի մնում ոչ մի Ադրբեջան: Դա չի նշանակում, որ Ադրբեջանը չէր պատրաստվում պատերազմի: Ադրբեջանը պատրաստվում էր, բայց մի բան է պատրաստվել, մեկ այլ բան, երբ պատերազմելը դառնում է հնարավոր ոչ միայն զուտ գործողության, այլ նաև որևէ ակնկալվող շատ թե քիչ ռացիոնալ արդյունքի տեսանկյունից: Թուրքիայի պարչագան, իհարկե, իր հերթին ունի մի շարք այլ գործոններ արդեն, թե ինչու Թուրքիայի համար էլ դարձավ հնարավոր: Սա արդեն այլ խոսակցության նյութ է»: