«Պատճառների վերաբերյալ ընդամենը վարկածներ կարող եմ առաջարկել». Արման Մելիքյան

Արցախի նախկին արտգործնախարար Արման Մելիքյանը ֆեյսբուքյան էջում գրել է. «Նախապես հայտնի էր, որ ՌԴ ներկայացուցիչ դեսպան Պոպովը համանախագահների այս տարածաշրջանային այցին չի մասնակցելու և բացակայում էր Բաքվում նախագահ Ալիևի հետ հանդիպմանը: Այդուհանդերձ, Արայիկ Հարությունյանը Երևան է գալիս համանախագահներին հանդիպելու նպատակով, բայց, արդեն այստեղ գտնվելով, հրաժարվում է միայն ամերիկացի ու ֆրանսիացի համանախագահների հետ հանդիպումից: Պատճառների վերաբերյալ ընդամենը վարկածներ կարող եմ առաջարկել: Չեմ բացառում, օրինակ, որ Արցախի Հանրապետության նախագահը նոր իրավիճակում պատրաստ չի եղել ներկայացնելու պաշտոնական Ստեփանակերտի մոտեցումները, քանի այդ մոտեցումները դեռևս մշակված չեն: Հնարավոր է նաև, որ այդ որոշումն ինչ-ինչ պատճառներով հայաստանյան իշխանությունների պնդմամբ է ընդունվել: Կրկին, որպես ենթադրություն, կարելի մտածել, որ, միգուցե Նախագահ Հարությունյանը հույսեր ունի, որ համանախագահների ամբողջական կազմը կհամաձայնվի այցելել Արցախ առաջիկայում և նախընտրել է հենց այդ տարբերակը: Եւ, վերջապես, որպես չորրորդ վարկած, հավանական կարող է լինել նաև այն, որ չհանդիպելու որոշումը կայացվել է հենց անմիջականորեն Մոսկվայի ճնշման տակ»: