«Իմ քայլը» Ն. Զոհրաբյանին Մարդու իրավունքների հանձնաժողովի նախագահի պաշտոնից ազատելու նախագիծ է մշակել

ՀՀ ԱԺ «Իմ քայլը» խմբակցությունն առաջարկում է դադարեցնել ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Նաիրա Զոհրաբյանի լիազորությունները: Այս մասին տեղեկանում ենք ԱԺ պաշտոնական կայքից: Նախագծի զեկուցող է հանդես գալու Արթուր Հովհաննիսյանը: Նախագծի հիմնավորումներում մի շարք կետեր է ներկայացվել, թե ինչու պետք է ԲՀԿ-ական պատգամավոր Նաիրա Զոհրաբյանի լիազորությունները՝ որպես հանձնաժողովի նախագահ, դադարեն:

Որպես օրինակ նախագծում բերված է Զոհրաբյանի՝ դեկտեմբերի 17-ին արված ֆեյսբուքյան գրառումը, որում մասնավորապես ասված է՝ «Ես ատում եմ քեզ ժեխ, որ իշխանության բերեցիր քո նմանին, ով դանդաղ փակում է մեր պետականության էջը»:
Դեկտեմբերի 22-ի մեկ այլ գրառմամբ պատգամավորը գրել է. «Երկրի թիվ մեկ խնդիրը տգիտությունն է: Նիկոլի ու նիկոլիզմի ավարտից հետո մենք, եթե կուզեք՝ այո, բռնի ուժով պիտի կրթենք նաև հասարակության այդ հատվածին, որ այլևս որևէ ընտրության ժամանակ չգնա ու իր հայելային արտացոլանքին չբերի իշխանության: Ես ժեխին հայրենիք չեմ տալու…»:

Ըստ «Իմ քայլի»՝ Զոհրաբյանի վերոնշյալ գրառումները և այլ հրապարակային ելույթներ մարդու արժանապատվութունը ոտնահարող արտահայտություններ են, հետևաբար նա չի կարող լինել մի հանձնաժողովի նախագահ, որի գործունեության առանցքը մարդու իրավունքների պաշտպանությունն է:

Այս նախագիծը պետք է ստանա գլխադասային հանձնաժողովի եզրակացությունը, որից հետո նոր կարող է ընդգրկվել նիստերի օրակարգ: