«Այսօրվա մեր օրենսդրությամբ՝ արտահերթ խորհրդարանական ընտրություններ անցկացնելու միայն մի մեխանիզմ կա»․ Փաշինյան

«Այո, ես հրապարակել եմ ճանապարհային քարտեզ, իմ առաջարկի մեջ ես կոնկրետ ժամկետներ չեմ առաջարկում արտահերթ խորհրադարանական ընտրությունների, և մյուս կողմից էլ կարող եմ հույս ունենալ, որ ճանապարհային քարտեզում նշված հարցերի առաջին շերտն առնվազն կարող է ավելի արագ լուծվել, քան ի սկզբանե նախանշում էինք»,- Հանրային հեռուստաընկերությանը տված իր հարցազրույցում ասաց ՀՀ վարչապետ Նիկոլ Փաշինյանը։

Ընդդիմության հետ կոնսուլտացիաների հետ կապված վարչապետն ասաց, որ իր առաջարկն առաջին հերթին խորհրդարանական ուժերի հետ խորհրդակցություններին է վերաբերում․ «Որվհետև այսօրվա մեր օրենսդրությամբ արտահերթ խորհրդարանական ընտրություններ անցկացնելու միայն մի մեխանիզմ կա․ այդ մեխանիզմը հետևյալն է՝ վարչապետը հրաժարական է տալիս, խորհրդարանը երկու անգամ վարչապետ չի ընտրում, և նշանակվում են արտահերթ խորհրդարանական ընտրություններ, և սրա համար պետք է համաձայնություն ձեռք բերել խորհրդարանական ուժերի հետ։ Կա նաև այլ տարբերակ, երբ Սահմանադրության մեջ փոփոխություններ ենք իրականացնում, և Խորհրդարանը ստանում է ինքնալուծարման և արտահերթ խորհրդրանական ընտրություններ նշանակելու լիազորություն։ Ինչո՞ւ եմ խորհրդակցությունների հրավեր անում․ մի պարզ պատճառով՝ կարևոր է, որ այդ որոշումը լինի ոչ թե կառավարության կամ խորհրդարանական մեծամասնության միանձնյա որոշմամբ, այլ դրա շուրջ որոշակի ըմբռնում ձեռք բերվի»,- ասաց նա։