«Երեկվա հարցազրույցից տպավորություն էր՝ Իլհամ Ալիևն է հայերեն արտահայտվում»․ Արծվիկ Մինասյան

ՀՅԴ ԳՄ անդամ Արծվիկ Մինասյանն այսօր ԱԺ-ի դիմաց ընթացող բողոքի ակցիայի ժամանակ՝ լրագրողների հետ զրույցում անդրադառնալով ՀՀ վարչապետ Նիկոլ Փաշինյանի երեկվա հարցազրույցին ասաց․ «Հարցազրույցը ցույց է տալիս, որ, իսկապես, դավաճանություն է եղել և շարունակվում է, ցավոք սրտի։ Երեկ, երբ ես լսում էի, տպավորություն էր՝ Իլհամ Ալիևն է հայերեն արտահայտվում և Նիկոլի կերպարանքն է ստացել։ Ինչ խոսում էր, խոսում էր թուրք-ադրբեջանական շահերի դիրքերից։ Մի նախադասություն չկար Հայաստանի Հանրապետության և հայ ժողովրդի շահերի պաշտպանության տեսակետից։ Անգամ հող հանձնելը, մարդկանց թուրքական, ադրբեջանական բանակի քմահաճույքին հանձնելը նա սրիկայաբար ներկայացնում է որպես անվտանգության մոտեցում։ Ուր է հասել մարդը, որ կեղծելով ու իրավական տգիտություն թույլ տալով՝ փորձում է ադրբեջանցիներին հաճոյանալ ու փորձում է հայ ժողովրդին խաբել, թե իբր եթե մենք չհանձնեինք, պատերազմ էր սկսվելու նորից։ Բա դու ինչի՞ համար ես։ Դրա համար ենք մենք ասում՝ էնքան ժամանակ քանի դեռ Նիկոլ Փաշինյանը կա, պատերազմը կամ հող հանձնելն անխուսափելի են»։