«Արտահերթ ընտրությունների օրակարգով չենք հանդիպելու Փաշինյանի հետ»․ Գևորգ Գորգիսյան

Մամուլում տեղեկություններ էին շրջանառվում, թե «Լուսավոր Հայաստանը» պատրաստվում է հանդիպել Նիկոլ Փաշինյանի հետ՝ քննարկելու արտահերթ ընտրությունների հնարավորությունը։

Խմբակցության պատգամավոր Գևորգ Գորգիսյանը, սակայն, հայտարարեց, որ այդ թեմայով չեն պատրաստվում հանդիպել Փաշինյանի հետ․ «Ճիշտն ասած, ես չեմ հասկանում, թե մամուլը նման անհեթեթություններ որտեղից ա վերցնում։ Ժամանակն է, որ բամբասանքներից ու ասեկոսեներից վերադառնանք լրատվության․․․։ Քանի որ մենք մեր օրակարգում հիմա չունենք գնալ արտահերթ ընտրությունների, մենք պահանջել ենք Փաշինյանից հրաժարական, որի դեպքում կձևավորենք նոր կառավարություն՝ միայն պրոֆեսիոնալների կազմով, երկիրը կկայունացնենք, նոր միայն կգնանք ընտրությունների։ Ակնհայտ է, որ այսօր, երբ նույնիսկ պատգամավորների անվտանգությունն ԱԺ մտնելիս կառվարությունը չի կարողանում ապահովել, անհեթեթ բան է խոսել նոր ընտրությունների մասին»,- ասաց Գորգիսյանը՝ վերահաստատելով, որ իրենց օրակարգում այժմ չկա հանդիպում Փաշինյանի հետ, բայց պատրաստ են հանդիպել, քննարկել նրա հրաժարականը։