«Թուրքերը և ադրբեջանցիները պատրաստվում են մեր դեմ նոր պատերազմի». Արման Աբովյան

ԱԺ «Բարգավաճ Հայաստան» խմբակցության պատգամավոր Արման Աբովյանի գրառումը. «Երբ ես զգուշացնում էի, որ Փաշինյանի տարած հայակործան և թուրքահաճո քաղաքականությունը, անխուսափելի առաջացնելու է լրջագույն խնդիրներ Հայաստանի Հանրապետության ֆիզիկական գոյության համար, ինձ հակադարձում էին, թե «մի խտացրեք գույները» կամ «միջազգային հանրությունը թույլ չի տա»։
Դե ուրեմն շատ ուշադիր կարդացեք Թուրքիայի էներգետիկայի նախարար Ֆաթիհ Դոնմեզի հայտարարությունը, որը վերաբերվում է 1923 թվականի Լոզանի պայմանագրի վերանայման հարցին։ Պարզապես հիշեցնեմ, որ այդ պայմանագրով որոշվել են Հունաստանի և Թուրքիայի միջև սահմանները։
Ահա այդ թուրք նախարարի ուղիղ խոսքը. «Առաջին համաշխարհային պատերազմից և դրան հաջորդած պատերազմներից հետո կային որոշ պայմաններ, որոնք պարզ չէին, և գուցե դրանք են այսօրվա քննարկումների հիմք դրել։ Դրանցից մեկը Լոզանն է։ Բայց անցել է 100 տարի, ես կարծում եմ, որ մենք կարող ենք նստել ու քննարկել դրանք, պայմանավորվել դրանց շուրջ»։ Հիմա հասկացա՞ք, թե ինչ գործընթացի մեկնարկ է տրվում այս հայտարարությամբ։ Փաստացի Թուրքիան փորձում է բերել քննարկման օրակարգ Հայաստանի Հանրապետության տարածքային ամբողջականության հարցը, ինչը շատ հստակ համապատասխանում է թուրքերի պանթուրանական նախագծի իրականացմանը: Սա նշանակում է, որ թուրքերը և ադրբեջանցիները շատ լուրջ պատրաստվում են նոր պատերազմի մեր դեմ՝ այս անգամ հարվածելով Զանգեզուրի, Սյունիքի և Մեղրիի ուղղությամբ, որ ի վերջո վերամիավորվեն Թուրքիան Ադրբեջանի հետ՝ Նախիջևանով միջանցք բացելով։ Իհարկե, թուրքերի այս կարգի հավակնություններն առաջացել են ո՛չ այսօր, ո՛չ երեկ, սա տասնյակ տարիների մշակված տեսլական է, որի իրագործման համար ըստ թուրքերի պետք էր սպասել հարմար պահի... ինչպես իրենք կարծում են, այդ պահն արդեն եկել է։ Պարզ է, որ թուրքերի հիմնական հույսը այս նախագծի իրականացման համար, Փաշինյանի թուրքահաճո տեսլականն է, որը ենթադրում է «հարաբերությունների բարելավում. Թուրքիայի և Ադրբեջանի հետ։ Այս պայմաններում փաշինյանական վերնախավը, գնալով քաղաքական և դիվանագիտական կոնտակտների թուրքերի և ադրբեջանցիների հետ, փաստացի կլեգիտիմացնի թուրքերի հավակնությունները մեր Հայրենիքի հանդեպ և սա չտեսնելը կամ չհասկանալը նշանակում է միայն երկու բան. կամ այսօրվա իշխանությունները կույր են, խուլ են և անմեղսունակ կամ ուղղակի թուրքական նախագծի կատարածու։ Երկու դեպքում էլ Փաշինյանի ԱՆՀՊԱՂ հեռանալը ոչ միայն անցյալ դավաճանական խայտառակության և կործանման հետևանք պետք է դիտարկվի, այլ ապագա կատաստրոֆիկ զարգացումների չեզոքացման միակ տարբերակ»։