«Կային թե՛ ինքնահակասումներ, թե՛ մանիպուլյացիա, թե՛ ճշմարիտ դրվագներ». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Սերժ Սարգսյանի հարցազրույցի հիմնական հասցեատերը լայն հանրությունը չէ: Կարծում եմ, հարցազրույցի հիմնական հասցեատերը նախկին կառավարող համակարգի տարբեր շերտերն են, ֆունկցիոներները, ընտրողները: Սարգսյանը նրանց փորձում է հիմնավորել, որ ինքը չէ 2018-ի պատասխանատուն, մեղավորը, հետևաբար նաև այսօրվա իրադրության պատասխանատու, որպես իշխանությունը պահել «չկարողացած»: Հարցազրույցի մոտիվը, թերևս, այդ համակարգի առաջատարների միջև պայքարն է, որի շրջանակում Սերժ Սարգսյանին փորձում են խաղից հանել այդ խմբերի և շերտերի մոտ, թերևս, տարբեր մեթոդներով ու խողովակներով ասելով, թե այս ամենին հենց Սարգսյանը հասցրեց, էլ ոնց կարող եք նրան հաշվի առնել կամ վստահել: Երրորդ նախագահի հարցազրույցը դիրքային պայքար է այդ շրջանակում: Ինչ վերաբերում է կարգավորման գործընթացի մասին բովանդակությանը, ապա էստեղ, իհարկե, բնականորեն կար թե՛ մանիպուլյացիա, թե՛ ինքնահակասումներ, թե՛, իհարկե, թերևս ճշմարիտ դրվագներ, որովհետև ի վերջո, կարծում եմ, Հայաստանի նախկին և ներկա ղեկավարներից ոչ ոք այդ աստիճան միամիտ կամ անմիտ չէ, որ հարցազրույցով ներկայացնի ամբողջական իրական պատկերը, որը շատ շատ ավելի բարդ է, քան՝ բուն գործընթացի մեխանիկան»: