«Մենք պատրաստ ենք այդ հանդիպմանը՝ մեր օրակարգով»․ Իշխան Սաղաթելյան

«Չգիտենք՝ Արմեն Սարգսյանը Նիկոլ Փաշինյանի հետ համաձայնեցրե՞լ է իր այս նախաձեռնությունը, թե ոչ։ Եթե իրենց պետք է մի տեսարան, որտեղ ընդդիմությունը Նիկոլ Փաշինյանի հետ մեկ սեղանի շուրջ կնստի, ինչպես երեկ ԳՇ-ում նման տեսարան ստացան, ապա ասեմ, որ այդ հաճույքը մենք իրենց չենք պարգևի։ Բայց, եթե իրականում ուզում են ստեղծված իրավիճակից ելքեր գտնեն, մենք պատրաստ ենք այդ հանդիպմանը՝ մեր օրակարգով»,- Բաղրամյան պողոտայում հրավիրված ասուլիսի ժամանակ ասաց ՀՅԴ Հայաստանի ԳՄ ներկայացուցիչ, «Հայրենիքի փրկության շարժման» համակարգող Իշխան Սաղաթելյանը։

Սաղաթելյանը նշեց, որ իրենց պայքարի և վճռականության հետ կապված որևէ բան չի փոխվել: «Նիկոլ Փաշինյանն ընտրություններից խոսում է այն ժամանակ, երբ շարժումը թափ է հավաքում, ուժեղանում է: Երբ շարժումն իր թափը որոշակիորեն կոտրում է, նա ասում է՝ դե լավ, ժողովրդական պահանջ չկա, ընտրություն չի լինելու: Նա հաճախ այս քայլերով կարողացել է ազդել շարժման ընթացքի վրա, այս անգամ չի հաջողվի դա նրան»,- նշեց Սաղաթելյանը։