«Գևորգ Կոստանյանի գործը Ինտերպոլը համարել է քաղաքական». Թագուհի Թովմասյանը փաստաթուղթ հրապարակեց

Այսօր լրագրողների հետ ճեպազրույցում ԱԺ անկախ պատգամավոր Թագուհի Թովմասյանը հայտարարեց, որ հեղափոխությունից 2,5 տարի հետո այնպիսի իրավիճակ է, երբ մինչև հիմա անհայտ է, թե ովքեր են սպանել 10 քաղաքացիներին, ով է հրաման տվել գնդակահարել ցուցարարներին փողոցում:

«Այս ընթացքում գլխավոր դատախազությունն ու ՀՔԾ-ն անընդհատ հավաստիացումներ էին տալիս, թե Մարտի 1-ի բացահայտմանը խանգարում են այն մի քանի հետախուզվող մարդիկ, հիմա դրանց էլ կբերենք, ամեն ինչ կբացահայտվի, բայց կյանքը ցույց է տալիս, որ, ըստ էության, նույնիսկ այն մարդիկ, որոնք ասում են՝ պատրաստ ենք գալ և ցուցմունքներ տալ, ՀՔԾ-ն չի ընդառաջում: Ստացվում է, որ շատ մարդիկ, ովքեր լքեցին Հայաստանը, հայտարարում էին, որ քաղաքական հետապնդման են ենթարկվում, և այդ հետապնդումը փորձում էին իրենց ձևակերպմամբ ապացուցել: Այդ պաշտոնյաների մեջ էր նաև նախկին գլխավոր դատախազ Գեւորգ Կոստանյանը»,- ասաց պատգամավորը:
«Այժմ կհրապարակեմ միջազգային հեղինակավոր քրեական ոստիկանության՝ Ինտերպոլի մի փաստաթուղթ, որն ուղղված է ՀՀ Ինտերպոլի ազգային բյուրոյին, որտեղ ասվում է. «Խնդրում ենք հաշվի առնել, որ իրավաբանական փորձաքննությունից հետո գլխավոր քարտուղարությունը եկել է այն եզրակացության, որ հետախուզվող անձի մասին ծանուցումը չի համապատասխանում Ինտերպոլի կանոնադրության 3-րդ հոդվածին»: Իսկ այդ հոդվածում ասվում է, որ կազմակերպությանը խստորեն արգելվում է ձեռնարկել քաղաքական, ռազմական, կրոնական, ռասսայական բնույթի որևէ միջամտություն: Հետևաբար, համապատասխան ծանուցում չի ուղարկվել և այդ անձի վերաբերյալ տեղեկությունը՝ Ինտերպոլի դեռևս 2020-ի ապրիլի 4-ին տվյալների բազայից հանվել է»,- նկատեց պատգամավորը:

«Այսինքն՝ Գևորգ Կոստանյանի գործը Ինտերպոլը համարել է քաղաքական և, ըստ էության, մերժել է Հայաստանի իրավապահներին հետախուզել նրան: Մինչդեռ մեր Դատախազությունն ու ՀՔԾ-ն անընդհատ հայտարարում էին, թե հետախուզում են հայտարարել»,- հավելեց Թովմասյանը: