«Քաղաքական որոշո՞ւմ ունեք վերացնելու դատարանների անկախությունը». Սամսոնյանը՝ Վարդանյանին

ԱԺ-ում այսօր՝ «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին» օրենքի նախագծի քննարկման ժամանակ «Լուսավոր Հայաստան» խմբակցության պատգամավոր Անի Սամսոնյանը, դիմելով «Իմ քայլը» խմբակցության պատգամավոր, նախագծի համահեղինակ Վլադիմիր Վարդանյանին ասաց, որ այս նախագծով իշխանությունն օժտելու է ԲԴԽ-ին հնարավորությամբ՝ միջամտելու դատարանների և դատավորների աշխատանքին. «Անկեղծ պատասխանեք, այս նախագիծը շուտափույթ ԱԺ բերելու համար մասնագիտակա՞ն քննարկումների արդյունքում եք հասել, թե՞ քաղաքական որոշում ունեք, որ պիտի կատարեք՝ վերացնելով դատարանների անկախությունը»,- Վարդանյանից հետաքրքրվեց ԼՀԿ պատգամավորը:

Արձագանքելով ընդդիմադիր գործընկերոջը՝ Վարդանյանն ասաց. «Մենք հնարավորություն ենք տալիս ԲԴԽ-ին ընդունել նորմատիվ իրավական ակտեր, որ վերջինը կարողանա առավել արդյունավետ կարգավորել այս կամ այն հարցը: Ի վերջո ԲԴԽ-ն գործադիր կամ օրենսդիր մարմին չէ. դատական իշխանության բաղկացուցիչ մաս է»:

Սամսոնյանը ևս մեկ անգամ կրկնեց իր հարցը՝ հավելելով, որ այսկերպ փորձ է արվում ԲԴԽ-ի միջոցով ճնշում գործադրել դատարանների վրա. «Մնում է միայն հասկանալ՝ ով է լինելու ԲԴԽ ձեր սրտի նախագահը, որ այս սև գործը կատարելու է դատարանների նկատմամբ: Դուք վնաս եք հասցնելու արդարադատությանը՝ ձեր առօրեական խնդիրները լուծելու համար: Ձեր խնդիրները դատարանում չեն, ձեր խնդիրները փնտրեք ձեր մեջ»,- ասաց Սամսոնյանը:

Վարդանյանը արձագանքեց, որ չգիտի՝ ինչ խնդիրների մասին է խոսում իր գործընկերը, բայց խոստացավ այդ մասին «լուրջ մտածել երեկոյան»: