«Ուզում ենք հանդիպել պատգամավորների հետ, հատկապես՝ «Իմ քայլի»». Արծվիկ Մինասյան

ՀՅԴ ԳՄ անդամ Արծվիկ Մինասյանն այսօր Դեմիրճյան փողոցում ընթացող ակցիայի ժամանակ անդրադարձավ ԱԺ-ում քննարկված և առաջին ընթերցմամբ ընդունված «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին» օրենքի նախագծին: Նա իշխանության գործողություններն ապօրինի որակեց: Մինասյանը հայտարարեց, որ իրենք ցանկանում են հանդիպել ԱԺ պատգամավորների հետ:

«Դիմում եմ ոստիկանությանը. մեր ցանկությունը կրում է խաղաղ բնույթ, և մենք ուզում ենք հանդիպում ունենալ ԱԺ պատգամավորների հետ, հատկապես՝ «Իմ քայլը» խմբակցության: Նրանք, ովքեր դուրս են գալու Դեմիրճյան մուտքից, սիրով պատրաստ ենք լսել իրենց հիմնավորումները և փոխանցել մեր կասկածները, ովքեր այլ մուտքերից են դուրս գալու, խնդրում եմ, հարգելի՛ ոստիկաններ, օժանդակե՛ք մեզ, որ մենք կարողանանք հանդիպել այդ պատգամավորների հետ: Եթե իրենք կխուսափեն, թող պաշտոնապես հայտարարեն, որ չեն ցանկանում հանդիպել: Ուզում եմ դիմել նաև այդ պատգամավորներին՝ մի՛ վախեցեք, ժողովուրդը ձեր նկատմամբ բռնության փորձ չի կատարի»,- հայտարարեց Մինասյանը: