«Հիմա այն վիճակն է, որ ոչ թե մեր բանակն է մեզ պաշտպանում, այլ՝ ռուսական բանակը»․ Վազգեն Մանուկյան

«Շատ մարդիկ որոշ հիասթափություն ապրեցին, որովհետև իրենց թվում էր՝ Ռուսաստանն ավելի շուտ պիտի խառնվեր և կանգնեցներ պատերազմը․ դա նրանց մոտ որոշ կասկածներ առաջացրեց, թե միգուցե Ռուսաստանի՞ն էլ էր դա ձեռնտու»,- այսօր՝ հարցազրույցի ժամանակ նշեց «Հայրենիքի փրկության շարժման» վարչապետի թեկնածու Վազգեն Մանուկյանը։
«Իմ տեղեկություններով՝ գրեթե ամեն օր, երբ Փաշինյանը Պուտինի հետ խոսել է, վերջինը ակնարկել է, թե՝ ի՞նչ է, էլի ուզում եք շարունակե՞լ պատերազմը։ Այսինքն՝ ինքը միշտ անուղղակի ձևով առաջարկել է պատերազմը կանգնեցնելու իր միջամտությունը»,- ասաց Մանուկյանը։
«Ռուսաստանը հայտարարեց, որ եթե պատերազմը հասնի Հայաստանի սահմաններին, ապա ինքը կպաշտպանի Հայաստանին՝ իր պայմանագրի համաձայն»,- ասաց Մանուկյանը՝ հայտարարելով, որ պատերազմի օրերին Ռուսաստանն անսպառ քանակությամբ զենք ու զինամթերք է մատակարարել Հայաստանին։
«Մերոնք էին, որ էս վիճակի մեջ քցեցին․․․ Հիմա այն վիճակն է, որ մեր բանակը մեզ չի պաշտպանում, ռուսական բանակն է պաշտպանում»,- հավելեց նա։