«Շուշիի հետ կապված դավադրություն է տեղի ունեցել․ ուշ թե շուտ այդ ծալքերը բացահայտվելու են»․ Ժ․ Սեֆիլյան

«Արկադիի մասին նոր բան ասել հնարավոր չէ, ամեն ինչ ասված է։ Բոլորիս համար շատ ցավալի է, որ մենք կորցրինք այսպիսի ժամանակահատվածում։ Ճիշտ պիտի լիներ, որ մեր մեծերը աշխարհիկ կյանքից հեռանային ավելի հանգիստ հոգով»,- այսօր, գեներել-մայոր Արկադի Տեր-Թադևոսյանի հոգեհանգստի արարողության ժամանակ, լրագրողների հետ զրույցում, ասաց ազատամարտիկ, «Սասնա ծռեր» շարժման անդամ Ժիրայր Սեֆիլյանը։

«Վստահաբար, առանց նույնիսկ իմանալու հիվանդության մանրամասները, այն, ինչ տեղի ունեցավ այդ 44 օրերի ընթացքում, նաև դրա հետևանքն է»,- ասաց նա։

Անդրադառնալով Շուշիի անկմանը, ազատամարտիկը նշեց, որ դավադրություն է տեղի ունեցել. Նա վստահեցրեց, որ ուշ թե շուտ այդ ծալքերը բացահայտվելու են։