«Ամեն գնով անձին դատապարտելու մոլուցքն ինքնին հակաիրավական, հակամարդկային և հակասահմանադրական է»․ Ա․ Օրբելյան

«Լրագրողական հետաքննություն սկսեք՝ ինչքան գումար է պետությունը ծախսել, դեռ գումարն եմ ասում, չեմ ասում՝ մարդուն ապօրինի կալանավորումը, 537 օր կալանքի տակ պահելու մասին, ինչքան գումար է հասարակությունը ծախսել․ դուք բոլորդ ամեն շաբաթ այստեղ էիք, մենք ամեն շաբաթ այստեղ էինք՝ քրեական գործընթաց, քրեադատավարական գործընթաց անցկացնելու համար, որը, ի սկզբանե բոլորին պարզ էր, որ ապօրինի է»,- լրագրողների հետ զրույցում՝ անդրադառնալով Ռոբերտ Քոչարյանի և մյուսների նկատմամբ 300․1 հոդվածով քրեական հետապնդումը դադարեցնելու դատարանի որոշմանը, ասաց փաստաբան Արամ Օրբելյանը։

«Ամեն գնով անձին դատապարտելու մոլուցքն ինքնին հակաիրավական, հակամարդկային և հակասահմանադրական է։ Մարդու անմեղության կանխավարկածը, որպես մարդու կարևորագույն իրավունքներից մեկը, պետք է վերջապես ընկալենք․․․ Չկա հանցագործություն, չկա որևէ արարք, որը ՀՀ-ում, որպես պետություն, կհամարվի հացագործություն, իսկ դատախազությունը շարունակում է սա դիտել տեխնիկական խնդիրների շրջանակում»,-ասաց Օրբելյանը՝ հավելելով, որ Ռ․ Քոչարյանի մեղադրանքի վերաորակման կամ նոր մեղադրանքի հիմք չկա։