«Բազմիցս կոչ եմ արել իշխանություններին` տալ համարժեք պատասխան «կիրթ» հարևանի հայտարարություններին»․ Մեղրու քաղաքապետ

Ինչպես արդեն հայտնել ենք, այսօր դատարանը քննում է Մեղրու քաղաքապետ Մխիթար Զաքարյանին կալանավորելու միջնորդությունը։ Քիչ առաջ Զաքարյանը դատարանի բակում լրագրողների հետ զրույցում անդրադառնալով Մեղրիով ճանապարհ բացելու վերաբերյալ մտահոգություններին, ասաց․ «Ես բազմիցս լրատվամիջոցների միջոցով զգուշացրել եմ Հանրապետության վարչապետի պաշտոնը զբաղեցնող անձնավորությանը և ընդհանրապես իշխանություններին՝ մեղրեցիների անհանգստության մասին»։

Զաքարյանի խոսքով՝ անորոշությունը, բորբոքվածությունը, ինֆորմացիոն վակուումը առաջացրեց գրգռվածություն։

«Բազմիցս կոչ եմ արել իշխանություններին տալ հստակ տեղեկատվություն՝ ինչ է սպասվում մեզ, հերքել «կիրթ» հարևանի արտահայտությունները, բայց քար լռություն։ Այդ իրադարձությունների զարգացումը բերեց այս միջադեպին»,- ասաց քաղաքապետը։