«Որևէ մեկը թող մեղմացնող արդարացում չմոգոնի նախկին տոտալիտար համակարգը փրկելու համար». Արմեն Դանիելյան

ՀՀ գլխավոր դատախազի նախկին տեղակալ Արմեն Դանիելյանը ֆեյսբուքյան իր էջում գրել է. «Ու երբեք որևէ մեկը թող որևէ մեղմացնող արդարացում չմոգոնի նախկին տոտալիտար համակարգը փրկելու կամ վերակենդանացնելու համար: Եվ մեղքը մի՛ գցեք ժամանակների վրա, թե ժամանակներն այդպիսին են եղել: Բայց ծանր ժամանակներում մարդիկ են եղել, որ կարողացել են հպարտ և կարգին մարդու կեցվածք ունենալ: Պարադոքսալ է, բայց լավ ժամանակներ երբեք չեն լինում: Ամենակարևորն այն է, թե մեզանից յուրաքանչյուրը ինչպես է դրսևորում ինքն իրեն այդ ժամանակների մեջ: Ու ի՞նչ, մենք սպասում ենք փափուկ, բամբակային ժամանակների՞: Կամ մենք երբևիցե իրավունք ունե՞նք սեփական ստորություններն արդարացնել ժամանակներով: Դե եկեք արդարացնենք. շուրջ երեսուն տարի իշխանությունները զբաղված են եղել թալանով, իսկ ժողովրդին ասել են՝ բանակ ենք պահում: Արդարացում միշտ կա ու կգտնվի: Ամեն մարդ ունի ընտրության իրավունք: Երբ ինչ֊որ մեկը ընտրում է ստորությունը, սկսում է դա արդարացնել ժամանակներով: Ու կոշիկի տակացու լիզող, ծաղկավոր անցյալ ունեցող ու ժողովրդի ատելությունը վայելող դեգեներատները թող իրենց անցյալի ստորությունները չփորձեն մաքրագրել վատ ժամանակներով...»: