«Լավրովն Ալիևին փոխանցելու է հայկական քայլերի հաջորդականությունը». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է․ «Ալիևը գերիներին պահում է՝ առավելապես Սյունիքի միջանցքի ստացումը Հայաստանում հոժար լռությամբ ապահովելու համար:

Պայմանավորվածությունը, անշուշտ, գաղտնի է իր երևանյան կատարածուի և մոսկովյան գործընկերոջ հետ:

Երեք գերի երեկ ազատեց, ի թիվս այլ գործոնների, նաև հայերին ազդակ հղելու, որ դա հնարավոր է, եթե և երբ միջանցքը տրամադրվի:

Լավրովն այսօր Երևան է ժամանում՝ միջանցքի բացման մանրամասները գաղտնի ռեժիմով քննարկելու համար:

Բացառված չէ, որ Հայաստանի առանձին հատվածների հանձնումն անվերադարձ դարձնելու նպատակով «խաղաղության համապարփակ պայմանագիր» են պատրաստում, որ հավերժական կապիտուլյացիայի և հավերժական կորստի երդմնագիր կարող է լինել:

Լավրովի այցը ոչ մի լավ բան իր հետ չի բերելու, թեև դա ժողովրդին վաճառվելու է, մասնավորապես, որպես գերիների ազատման ուղղությամբ լուրջ աշխատանք:

Երևանից Բաքու մեկնելով՝ Լավրովն Ալիևին փոխանցելու է հայկական քայլերի հաջորդականությունն ու ստանալու այդ ամենի դիմաց իրենց վարձը:

Եվ այս ամենին հայ ժողովուրդը շարունակելու է հետևել կողքից՝ կարծես՝ իրեն ու իր երկիրը չեն վաճառում: Կարծես՝ իրեն ու իր երկիրը չեն հետևողականորեն ոչնչացնում»: