«Մի բան ասել է, երկու տարի ունեցել է հնարավորություն՝ ապացույցներ ձեռք բերելու, չի կարողացել». Հայկ Ալումյան

Ինչպես հայտնել էինք, ՀՀ երկրորդ նախագահ Ռոբերտ Քոչարյանը դիմել է դատարան՝ ՀՀ վարչապետ Նիկոլ Փաշինյանին զրպարտության համար պատասխանատվության ենթարկելու պահանջով՝ իր հասցեին արված արտահայտությունների համար:

Հիշեցնենք՝ ավելի վաղ Հայկ Ալումյանը հայտնել էր, որ հայցի հիմքում՝ 2020թ. գարնանը քարոզարշավի ժամանակ Նիկոլ Փաշինյանի հայտարարություններն են, մասնավորապես՝ 2,4 մլրդ դոլարով պետք է ավելանա պաշտպանության բյուջեն, որից 1,2 մլրդը պետք է վերադարձվի թալանված գումարը, և այդ հայտարարության ժամանակ հնչել է Ռոբերտ Քոչարյանի անունը:

«Խոսելուց առաջ ինքը պետք է ապացույցներ ունենա, նոր խոսի: Խոսողն էն անձն է, որ ապացույցներ ձեռք բերելու, տվյալներ հավաքելու համար բոլոր լծակներն ունեցել է՝ իրավապահ բոլոր մարմիններն իր տրամադրության տակ են: Հիմա էդ մարդը մի բան ասել է, երկու տարի ունեցել է հնարավորություն՝ ապացույցներ ձեռք բերելու, չի կարողացել: Մի տարի է էլ դատի ենք տվել ու էս ընթացքում էլի ոչինչ չի կարողացել հավաքել: Գիտե՞ք՝ ինչ ա բերել որպես ապացույց. ռուսական կայքից 2011թ. տեղեկատվություն, թե իբր այս, այս, այս գույքերը պատկանում են Ռ. Քոչարյանին»,- այսօր լրագրողների հետ զրույցում ասաց Ալումյանը՝ տեղեկացնելով, որ դատական նիստը հետաձգվել է մինչև սեպտեմբեր: