«Ադրբեջանական կողմն ուզում է ձեռք բերել ականապատ տարածքների քարտեզները, սակայն փոխարենը ոչինչ չանել»․ Սոֆյա Հովսեփյան

«Արդեն շատ երկար ժամանակ ադրբեջանական կողմն ուզում է ձեռք բերել ականապատ տարածքների քարտեզները, սակայն, ինչպես միշտ, ուզում է ստանալ այն, բայց փոխադարձ ոչինչ չանել, իսկ մեր կողմը հերթով ամեն ինչը զիջում է՝ փոխարենը որևէ պահանջ չներկայացնելով կամ ներկայացնում է, բայց չի կիրառվում»,- այսօր՝ լրագրողների հետ զրույցում, անդրադառնալով ՌԴ ԱԳ նախարար Սերգեյ Լավրովի Բաքու այցի ժամանակ հայկական կողմի գերիներին վերադարձնելու վերաբերյալ և մի շարք այլ քննարկումներին, ասաց ԱԺ անկախ պատգամավոր Սոֆյա Հովսեփյանը։

«Անգամ երբ պայմանավորվում են, որ 30 ռազմագերի պիտի վերադարձվի, վերջում 3 կամ 5 անձ է վերադառնում»,- նկատեց Հովսեփյանը։

«Պետք է ոչ թե ականապատ տարածքների քարտեզները տրամադրենք, հետո ստանանք գերիներին, այլ բոլոր գերիներին, անգամ նրանց, որոնց չեն ընդունում, որ իրենց մոտ են, բայց տեսանյութերով և մի շարք այլ փաստերով հաստատված է, վերադարձնեն, նոր ինչ-որ փաստաթուղթ տրվի»,- հավելեց պատգամավորը։