Ռուբեն Ռուբինյանը՝ աղմկահարույց փաստաթղթի մասին

«Կարող եք տասը տարբեր ձևի հարց տալ հողերի հանձնման վերաբերյալ, կա՞, թե՞ չկա, ես ձեզ տասը անգամ ասելու եմ՝ չկա»,- այսօր ԱԺ-ում լրագրողների հետ զրույցի ժամանակ հայտարարեց իմքայլական պատգամավոր Ռուբեն Ռուբինյանը:

Պատգամավորն ընդգծեց՝ փաստաթուղթը, որը տարածվել էր համացանցում, առաջարկվել է ՌԴ-ի կողմից՝ եռակողմ հանձնաժողով ստեղծելու համար, և որը զբաղվելու է դելիմիտացիայի և դեմարկացիայի հարցերով. «Ուշադրություն՝ ոչ թե անել դելիմիտացիա և դեմարկացիա հիմա, կամ վաղը, կամ մեկ ամսից, այլ ուղղակի ստեղծել նման հանձնաժողով: Մենք, ի պատասխան այդ առաջարկին, մեր հստակ դիրքորոշումն ենք հայտնել առ այն, որ սա կարող է տեղի ունենալ միայն ադրբեջանական զորամիավորումների՝ ՀՀ ինքնիշխան տարածքից դուրս գալու և ելման դիրքեր վերադառնալու դեպքում»,- ասաց Ռուբինյանը:

Նա ընդգծեց, որ այդ փաստաթուղթը որևէ կապ չունի Արցախի Հանրապետության սահմանների հետ: