«Երեկ հրատապ հավաք հրավիրեցինք ու կրկին տեսանք, որ հանրությունը չարձագանքեց այնպես, որ վռնդենք այս իշխանությանը»․ Ա․ Վանեցյան

«Մեզ ասում են երկիրը կործանվում է, դուք պատրաստվում եք ընտրություններին»,- այսօր՝ լրագրողների հետ զրույցում ասաց «Հայրենիք» կուսակցության ղեկավար Աթուր Վանեցյանը։ «Ամբողջությամբ կիսում եմ այդ մտահոգությունը, այո՛, հիմա մենք ընտրություններ անցկացնելու բարոյական իրավունք չունեինք, բայց ունենք, այն, ինչ ունենք: Երեկ՝ երբ դեմարկացիայի և դելիմիտացիայի հայտարարությունը հայտնի դարձավ, «Պատիվ ունեմ» դաշինքի մաս կազմող քաղաքական ուժերը հրատապ հավաք հրավիրեցին, հավաքվեցինք Կառավարության դիմաց ու կրկին տեսանք, որ հանրությունը չարձագանքեց այնպես, որ հնարավոր լինի վռնդել այս իշխանություններին: Մեզ մնում էր չհամաձայնվե՞լ, չմասնակցե՞լ արտահերթ ընտրություններին և հնարավորություն տալ այս կապիտուլյանտ իշխանություններին վերարտադրվե՞լ: Ո՛չ, բոլորս պետք է մասնակցենք և ամեն ինչ անենք, որ իրենք ընտրությունների արդյունքում որևէ հնարավորություն չունենան վերարտադրվելու»,- նշեց Վանեցյանը։

Անդրադառնալով խորհրդարանական արտահերթ ընտրություններին մասնակցող ընդդիմադիր մյուս ուժերին՝ Վանեցյանն ասաց․ «Մեր նպատակը մեկն է՝ րոպե առաջ դուրս շպրտել այս ապազգային, անհայրենիք իշխանություններին։ Մենք մրցակիցներ ենք, բայց հակառակորդներ չենք»։