«Սա կլիներ ծիծաղելի, եթե այդքան նողկալի ու տխուր չլիներ». Խզմալյանի արձագանքը՝ Իշխանյանի ու Մելիքյանի հեգնանքին

Եվրոպական կուսակցության նախագահ Տիգրան Խզմալյանը ֆեյսբուքյան իր էջում գրել է. «Սա կլիներ ծիծաղելի եթե այդքան նողկալի ու տխուր չլիներ։ Հասկանում եմ, որ պարոնայք Իշխանյանն ու Մելիքյանը փորձում են հեգնել Հայաստանի Եվրոպական կուսակցության անվանումը, գաղափարն ու գոյությունը։ Այս բարձրաշխարհիկ ծաղրանքի հեղինակներից մեկն է «Հայաստանի Հելսինկյան կոմիտեի» իրավապաշտպան հասարակական կազմակերպության ղեկավար Ավետիք Իշխանյանը։ Ինչո՞ւ է նա տարիներ շարունակ գլխավորում հենց «Հելսինկյան կոմիտեն», այլ ոչ, ասենք, Սիդնեյական, Պեկինյան կամ Մոսկովյան որևէ կոմիտե։ Պառճառը պարզ է՝ քանի որ հենց Եվրոպական քաղաքակրթությունն է հիմնված մարդու իրավունքների, ազատությունների և արժեքների վրա։ Սակայն Հելսինկյան կոմիտեի ղեկավար-իրավապաշտպան Ավետիք Իշխանյանը տարօրինակ մաղձով ու հեգնանքով է լցվում նրանց հանդեպ, ով նույն այդ գաղափարները պաշտպանելու և տարածելու համար ստեղծել են Հայաստանի Եվրոպական կուսակցությունը։ Իշխանյան եղբայրները յուրահատուկ թուլություն ունեն իմ համեստ անձի նկատմամբ՝ այսպես, Վահան Իշխանյանն անգամ մի ամբողջ գիրք է անվանել «Ռուսուլմանի նոթեր», օգտագործելով վերնագրում իմ ստեղծված բառը և մեղադրելով ինձ ռուսատյացության մեջ։ Ցավալի է, որ Ռաֆայել Իշխանյանի զավակներն են իրենց հեգնանքի ու մաղձի թիրախ ընտրել հենց այն գաղափարախոսությունը, որի դրոշակակիրն ու ջատագովն էր նրանց հարգարժան հայրը։ Ծիծաղեք, պարոնայք։ Հայաստանի Եվրոպական կուսակցությունը եվրոպական հանդուրժողականությամբ և հայկական մեծահոգությամբ ձեզ էլ է փրկելու ռուսուլմանական ցնորքից։ Տապանում բոլոր տեսակի զույգերի համար տեղ կգտնվի»։

Նշենք, որ ավելի վաղ Ռուբեն Մելիքյանը ֆեյսբուքյան իր էջում հրապարակել էր լուսանկար Ավետիք Իշխանյանի հետ ու գրել. «Հենց նոր կայացավ Հայաստանի Ավստրալիական կուսակցության հիմնադիր համագումարը։ Պատրաստվում ենք վաղը գրանցել կուսակցությունը՝ առաջիկա արտահերթ խորհրդարանական ընտրություններին մասնակցելու և երկիրը փրկելու նպատակով։ Մեր կարգախոսն է. «Հայաստանի փրկությունը գալու է անսպասելի տեղից»։
Համագումարի միաձայն որոշմամբ ցուցակը կգլխավորի կուսակցության առաջնորդ Ավետիք Իշխանյանը»։