«Քաղաքական նշաձողը շատ է իջել»․ Արթուր Բաղդասարյան

ՕԵԿ նախագահ Արթուր Բաղդասարյանը ֆեյսբուքյան իր էջում գրել է. «Սիրելի՛ հայրենակիցներ, Հայաստանի ինքնիշխան տարածքի նկատմամբ շարունակվող ոտնձգությունները և դրանց նկատմամբ ոչ ադեկվատ, իրարամերժ, հախուռն, կցկտուր և անհավասարակշիռ արձագանքը մի կողմից էլ ավելի է խորացնում մեր սահմաններին ստեղծված բարդագույն իրավիճակը, մյուս կողմից վկայում է առկա և աճող լրջագույն մարտահրավերների նկատմամբ պետական ինստիտուտների կողմից համակարգված քաղաքականության բացակայության, առկա առանցքային վտանգներին մակերեսային մոտեցում ցուցաբերելու իրարամերժ, աններելի, իսկ որոշ դեպքերում նույնիսկ անկանխատեսելի վարքագծի մասին։ Ոչ պակաս վտանգավոր հրապարակային վարքագիծ և հռետորական անհեռատես դիրքորոշում են դրսևորում նաև քաղաքական դաշտում հայտնված վարչապետների թեկնածուների շքերթի մեկնարկ տված որոշ պսևդոքաղաքական ուժեր ևս, որոնք երբեք ո՛չ եղել են և ո՛չ էլ հասկանում են ռեալպոլիտիկի բովանդակությունը։ Եվ ցավոք, այս անհեռանկար և անպատասխանատու լեզվային սայթաքումներով էլ ավելի են բարդացնում իրավիճակը և շատ հաճախ առանց հասկանալու թշնամուն ի ցույց են դնում թե՛ իրենց և թե՛ որոշում կայացնողների անադեկվատությունը, անկարողությունն ու անզորությունը։ Իսկապես, քաղաքական նշաձողը շատ է իջել։ Հասկանալի է, ընտրություններ են, քվե է անհրաժեշտ։ Բայց առաջնային անհրաժեշտը՝ մտածել նոր խոսելն է, ոչ թե խոսելուց հետո մտածելը, առավել ևս, որ անպատասխանատու և անհավասարակշիռ խոսքը կամ ռուսերեն ասած (словесный понос)-ը էլ ավելի է խճճում առանց այն էլ ոչ դյուրին իրավիճակը»։