«Նավթը, որպես այդպիսին, Ադրբեջանում գրեթե սպառված է. այդ երկիրը տակից քայքայվում է». Նաիրի Հոխիկյան

«Ադրբեջանը, անկախ ամեն ինչից, քայքայվող, կործանվող պետություն է»,- այսօր տեղի ունեցած մամուլի ասուլիսի ժամանակ ասել է լրագրող Նաիրի Հոխիկյանը՝ ներկայացնելով փաստեր: «Պետք է մի քանի կարևոր հանգամանք հաշվի առնենք. նավթը, որպես այդպիսին, Ադրբեջանում գրեթե սպառված է: Փաստեր ասեմ. 2017 թվականին Ադրբեջանն օրական արդյունահանում էր 2 մլն բարել նավթ, 2019-ին՝ օրական 0,6 մլն բարել նավթ, 2020-ին՝ հասել է 0,3 մլն բարելի»,- ասել է նա:

«Այդ երկիրը, որը նստած է նավթի վրա, տակից քայքայվում է: Երբ փողը վերջանա, նավթադոլարները վերջանան, Ադրբեջան պետությունն արդեն հետաքրքիր չի լինի ոչ մեկին, այդ թվում՝ Թուրքիային»,- նկատել է բանախոսը:

Նա կրկնել է, որ այս պայմաններում մեզ համար ոչ թե կարևոր է որևէ փաստաթուղթ ստորագրելը, որը բազմաթիվ խնդիրներ է ստեղծելու, այլ հակառակը՝ գնալ նույն Ադրբեջանի ճանապարհով՝ ձգձգել այն տարբեր առիթներով և թույլ չտալ, որ տեղի ունենա: «Պետք է սպասել՝ գա ժամանակը, իսկ դա կլինի 4-5 տարի հետո, ոչ թե 20-30 տարի հետո, և մենք կվերադարձնենք մեր տարածքները»,- վստահեցրել է Նաիրի Հոխիկյանը: