«Չեմ պատրաստվում ներողություն խնդրել»․ Լենա Նազարյան

«Ներողություն խնդրել չեմ պատրաստվում։ Տիկին Թովմասյանն ինքը պետք է ներողություն խնդրի, որ, լինելով «Իմ քայլը» խմբակցության անդամ, իրականում եղել է ոչ թե թիմի անդամ և «Իմ քայլը» խմբակցության պատգամավոր, այլ իր թերթի թղթակից և խմբակցության նիստերին մասնակցել է բացառապես էդ նպատակով»,- այսօր՝ լրագրողների հետ ճեպազրույցում, հայտարարեց ԱԺ փոխխոսնակ Լենա Նազարյանը։

«Թող ներողություն խնդրի, որ եկել է մեր խմբակցություն՝ առաջին իսկ հարմար պահին մեր երեսին դուռը շրխկացնելու համար, ապա հաջորդ ցուցակ գնալու և էնտեղից օգուտներ ստանալու ու, երևի, հաջորդ ցուցակ անցնելու համար։ Թող ներողություն խնդրի նրա համար, որ, լինելով խմբակցության անդամ պատերազմի ամբողջ ընթացքում, պարտությունից հետո դուրս է եկել խմբակցությունից և հայտարարել, որ պատասխանատվությունը մերն է»,- ասաց նա։

Հիշեցնենք, որ այսօր՝ ԱԺ արտահերթ նիստի ժամանակ, ԱԺ փոխխոսնակ Լենա Նազարյանը Թագուհի Թովմասյանի ելույթից հետո վերջինի նկատմամբ վիրավորական արտահայտություն էր հնչեցրել՝ անվանելով «իդիոտկա»։