«Կզարմանայի, եթե Տեր-Պետրոսյանը չասեր ողջ ճշմարտությունը». Արտակ Հարությունյան

Ակտիվիստ Արտակ Հարությունյանը ֆեյսբուքյան իր էջում գրել է. «Ես կզարմանայի, եթե քարոզարշավի ընթացքում, հավատարիմ իր սկզբունքներին, Տեր-Պետրոսյանը չասեր ողջ ճշմարտությունը, որքան էլ որ դա ցավոտ լինի, որքան էլ, որ դրան հավատալը անցանկալի լինի:
Գնդակը մեր դաշտում է: Կշարունակենք ապրել երազանքներով ու ցնորքներով, թե իրականությանը կնայենք ուղիղ, փորձելով ստեղծված իրավիճակում քաղել մաքսիմալ հնարավորը: Արցախի բնակեցում, Արցախին նյութապես հնարավորինս աջակցում, որպեսզի չլինի հայաթափում, որ կարողանանք Արցախը պահել հայկական:
Սա է, որ Հայաստանը կարող է անել: Մնացած բոլոր մեծագոչ ուղերձները, որ հեսա կգնանք, Շուշին ու Հադրութը հետ կբերենք, Բաքվում չայ կխմենք, մեզ նորանոր փորձանքների մեջ են գցելու: Կասեք դավաճա՞ն եմ: Ասեք:
2017-ին էլ էիք ասում, երբ կար ռեալ շանս ընդամենը 5 շրջանի դիմաց հարցի լուծման: Իսկ էսօր ձեր արկածախնդրության պատճառով կորցրեցինք 5-ը, նաև 2-ը ու նաև Շուշին ու Հադրութը, զոհեցինք ու հաշմանդամ դարձրինք մի ամողջ սերունդ, բանակը ջախջախեցինք, ծայրաստիճան մեծացրինք Ռուսաստանից կախվածությունը, ու փոխանակ գիտակցենք, որ մենք էինք մեղավոր, մեղքը սկսեցինք գցել մնացած բոլորի վրա:
Իշխանությունը մեղքը չընդունեց: Մեղադրեց կամավորներին, փախնող զինվորին, գեներալներին, ժողովրդին, բոլորին, բացի իրենից:
«Ընդդիմությունը» մեղքը չընդունեց, որ իր կառավարման տարիների քաղաքականությունը բերեց սրան, փոխարենը մեղքը գցեց իշխանության վրա:
Մտավորականությունն ու ընդդիմությունը մեղքը չընդունեցին. մի մասը մեղադրեցին գործող իշխանությանը, մի մասը նախկին իշխանությանը, մի մասը բանակին, մի մասը կամավորներին, մի ահռելի մասն՝ իհարկե Տեր-Պետրոսյանին: Բոլորին, բացի ինքն իրենից:
Ու հիմա նորից նույն շրջափուլի՞ մեջ ենք մտնելու: Նորից իրատեսություն չի՞ լինելու: Նորից երազանքերո՞վ ենք ապրելու: Մինչև լրիվ հայաթափե՞նք երկիրը, նոր զոհեր ու նոր տարածքնե՞ր տանք:
Լրջանալու պահը եկել ա»: