«Մի՞թե հնարավոր է, որ արցախյան հարցում 1998-ին «պայծառատես» մարդն այդպիսի միամտություն ունենար». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է․ «Առաջին նախագահը շատ կարևոր բաներ է ասում՝ ավելի ու ավելի վաստակելով իմաստուն և հեռատես գործչի համբավ, կամ հաստատելով այն: Եվ այդ ամենով հանդերձ՝ ավելի է հետաքրքիր դառնում, թե այդ իմաստուն ու հեռատես գործիչը, որ հիանալի ճանաչում էր Ռոբերտ Քոչարյանին և «մոնղոլ-թաթարական» կառավարման համակարգը՝ իր բնույթով, ինչպե՞ս էր մտածում, թե այդ համակարգն առանց ուժի և դիմադրության զիջելու է իր տեղը 2008 թվականին: Մի՞թե հնարավոր է, որ արցախյան հարցում 1998 թվականին «պայծառատես» մարդն այդպիսի միամտություն ունենար 2008 թվականին, ընդ որում, նույնիսկ առավոտյան ուժի կիրառումից հետո, և Մյասնիկյանի արձանի մոտ հավաքված հանրությանը ցրվելու հորդոր կամ կոչ հղեր միայն այն բանից հետո, երբ արդեն կային սպանվածներ: Մի օր գուցե մի հարցազրույցով էլ Առաջին նախագահը կանդրադառնա այդ թեմային՝ բացատրելով «պայծառատեսության» ու «միամտության» այդ կոնտրաստը: Իսկ դա կարևորագույն հարց է, որովհետև 2008-ի մարտի 1-ի արյունահեղությունը նույնքան շրջադարձային կետ է հոկտեմբերի 27-ից հետո հազիվ ուշքի եկող պետության համար, որքան հենց 27-ն էր»: