«Եթե տվյալ անձին տրված է օրենքից դուրս հրաման, առաջին քայլը՝ ուսադիրները հանելուց հետո, դատարան մեկնելն էր». փոխոստիկանապետ

«Արձագանքելու որևէ բան չունենք, որովհետև դա չի համապատասխանում իրականությանը»,- մեկնաբանելով այն տեղեկատվությունը, թե երեկ ՀՀ վարչապետի պաշտոնակտարի հետ որպես աջակիցներ Սյունիք էին մեկնել քաղաքացիական հագուստով ոստիկաններ, ասաց փոխոստիկանապետ Արա Ֆիդանյանը:

«Մեր ուժերն առանց այն էլ բավարարում են ապահովել մեր բուն ֆունկցիոնալ գործառույթները, և որևէ նման դեպք, վստահեցնում եմ, տեղի չի ունեցել»,- նշեց նա:

Անդրադառնալով Արարատի Ավշար համայնքում Ներքին զորքերի աշխատակցի հայտարարությանը, փոխոստիկանապետն ասաց. «Մենք հարգում ենք մեր ծառայակից բոլոր գործընկերներին, բայց այն անձը, որը որ իրեն թույլ է տալիս տևական ժամանակ ոստիկանություն ծառայություն իրականացնող անձանց խորհուրդներ տալ, ապա այդ անձը պետք է որոշակի ավանդ ունենա ոստիկանությունում: Մեր ծառայակից գործընկերը ոստիկանության Ներքին զորքերի համակարգ ընդունվել է 2020 թվականի սեպտեմբերին, չի մասնակցել նույնիսկ պատերազմական գործողություններին այն դեպքում, երբ Ներքին զորքերի ողջ անձնակազմը մասնակցել է: Առնվազն մեկ տարվա ավանդ պետք է ունենալ ոստիկանությունում, որպեսզի մնացյալին խորհուրդներ և ուղղություներ տան:

Եթե տվյալ անձը տեսնում է՝ իրեն տրված է օրենքից դուրս հրաման, ես ձեզ վստահեցնում եմ՝ առաջին քայլը՝ ուսադիրները հանելուց հետո, նա կմեկներ դատարան, որ վիճարկեր իր այդ թեզը»,- ասաց Արա Ֆիդանյանը: