«Օսլայած վերնաշապիկով հարուստ տղամարդկանց նկարները 30% աղքատություն ունեցող երկրում կարող էր զայրույթ ու հակակրանք առաջացնել»․ Ա․ Ղարիբյան

«Իրավունքի ուժը» ՀԿ համահիմնադիր Արման Ղարիբյանը ֆեյսբուքյան իր էջում գրել է. «Էլիտա vs աղքատներ,
կամ ինչու պարտվեց քոչարյանը
Ընտրություններում հաղթում են ընտրողների մեծամասնության ձայնը ստանալու դեպքում, սա քանակական պայքար է։
Հայաստանի բնակչության 30%-ը աղքատ է, ևս 50%-ը անգամ միջին խավի կենսամակարդակ չունի։ Սա շատ լավ գիտեն բոլորը, բայց այս փաստն իր օգտին աշխատեցրեց միայն փաշինյանը։
Նա դեռևս 17+ի շարժման ժամանակ հայտարարեց, թե սա էլիտաների պայքարն է իր դեմ։ Սրանք էլ հիմարաբար կուտը կերան ու սկսեցին իրենք իրենց անվանել էլիտա՝ այսպիսով ընդունելով, որ դա ժողովրդական շարժում չէ։ Իրավիճակն ավելի սրվեց, երբ փաշինյանի աջակիցներին այս «էլիտարները» սկսեցին անվանել ժեխեր, բոմժեր։
Մեր հասարակությունում էլիտարության նկատմամբ բացասական վերաբերմունք կա, անգամ ատելություն։ Շատերը մտածում են, որ էլիտան իրենց հարստահարելու շնորհիվ է հարստացել։
Եվ ահա, ինչպես 17-ի շարժման ժամանակ, այդպես էլ նախընտրական փուլում քոչարյանը շարունակեց մնալ էլիտայի թեկնածուն, իսկ փաշինյանը՝ ճիշտ հակառակը․ նա իրեն դիրքավորեց որպես ժողովրդական թեկնածու, նա գնաց մարդկանց մեջ և խոսեց ժողովրդական լեզվով, երբեմն՝ գռեհիկ։
Անգամ պաստառի վրա նա ավելի մեծ տառերով գրեց իր անունը, քան ազգանունը՝ դրանով իրեն մոտ պահելով ժողովրդի մեծամասնությանը։ Իսկ «Հայաստան» դաշինքի օսլայած վերնաշապիկով հարուստ տղամարդկանց նկարները 30% աղքատություն ունեցող երկրում կարող էր և զայրույթ ու հակակրանք առաջացնել։
Զարմանում եմ, որ գերհարուստ քոչարյանի կողքին չեն գտնվել մասնագետներ, որ բացատրեն նրան սա։
Այսպիսի պայմաններում 20-21% ձայնը անգամ շատ է, դժվար չէ գուշակել, որ այդ ձայների մի մասը փաշինյանին ատողների և նրան պատժել ցանկացողների ձայներն են։
Մենք ունենք այն, ինչ ունենք, եթե ուզում եք հասարակությանը փոխել, կրթեք։ Բայց կրթեք սիրելով, ոչ թե արհամարհելով ու վերևից նայելով»։