««Նստիր տե՛ղդ», «դո՛ւք նստեք ձեր տեղը»»․ վիճաբանություն Սեդա Սաֆարյանի և Էրիկ Ալեքսանյանի միջև

Այսօր՝ դատարանում Ռոբերտ Քոչարյանի և մյուսների նկատմամբ քրեական հետապնդումը դադարեցնելու որոշման դեմ բողոքի քննության ժամանակ, վիճաբանություն տեղի ունեցավ Մարտի 1-ի գործով տուժողների պաշտպան Սեդա Սաֆարյանի և Արմեն Գևորգյանի պաշտպան Էրիկ Ալեքսանյանի միջև։

Սեդա Սաֆարյանն առարկություն հայտնեց դատական նիստը հետաձգելու վերաբերյալ։

«Անդրադառնանք պաշտպանական կողմի միջնորդությանը՝ դատական նիստը հետաձգելու, ողջամիտ ժամկետ տրամադրելու, դատական նիստի արձանագրությանը ծանոթանալու, վերծանելու, և հաջորդ նիստին փաստարկված իրենց դիրքորոշումները ներկայացնելու համար»,- հայտարարեց դատավոր Նարինե Հովակիմյանը և հետաքրքրվեց՝ արդյոք առարկություններ կան։

«Այո՛, կան․․․ Ի՞նչն է պատճառը, որ ուզում են հետաձգել։ Ես միտում եմ տեսնում, գտնում եմ, որ կարող են հիմա պատասխան ներկայացնել»,- ասաց նա։

Վիճաբանություն սկսվեց Սեդա Սաֆարյանի և Էրիկ Ալեքսանյանի միջև։ Էրիկ Ալեքսանյանը Սաֆարյանի խոսքերը որակեց ոչ պատշաճ։

«Պատշաճ եմ, նստիր տե՛ղդ»,- պատասխանեց Սաֆարյանը։

«Դուք մի՛ ասեք՝ ով նստի տեղը դատարանում»,- Սաֆարյանին դիմելով՝ ասաց դատավորը։

«Դուք էլ նստեք ձեր տեղը, ու մյուս անգամ էդպես չխոսեք ինձ հետ»,- Ալեքսանյանն էլ իր հերթին ասաց Սաֆարյանին։